एजेन्सी – दक्षिण अफ्रिकामा जारी आइसिसी यू १९ विश्व कप क्रिकेटमा बंगलादेश विजयी भएको छ । समूह एमा सोमबार बंगलादेशले आयरल्यान्डलाई ६ विकेटले हराएको छ । दोस्रो खेलमा बंगलादेशको यो पहिलो जित हो । पहिलो खेलमा बंगलादेश भारतसँग पराजित भएको थियो ।

२ सय ३६ रनको लक्ष्य पछ्याएको बंगलादेशले ४६.५ ओभरमा ४ विकेट गुमाउँदै पूरा गरेको थियो । सामूहिक प्रदर्शनको नमुना प्रस्तुत गर्ने क्रममा बंगलादेशका मोहम्मद शिहाब जेम्सले नकआउट अर्धशतक पूरा गरे । ६३ बल खेलेका उनले ३ चौका र १ छक्का साथ ५५ रन बनाएका थिए ।

अरर अमिमले नटआउट ४५, ओपनर असिकुर रहमान शिब्लीले ४४ अर्का ओपनर अदिल विन सिद्धिकले ३६, चौधुर मोहम्मद रिजवाले २१ र अरिफुल इस्लामले १३ रन बनाएका थिए । आयरल्यान्डका स्कट म्याकबेथले २, जोन म्याकनेली र म्याथु विल्डनले समान १ विकेट लिए ।

त्यसअघि बंगलादेशले टस जितेर आयरल्यान्डलाई पहिले ब्याटिङको निम्ता दिएको थियो । केन हिल्टनको ९० रनको मद्दतमा आयरल्यान्डले निर्धारित ५० ओभरमा ८ विकेटको क्षेतिमा २ सय ३५ रनको योगफल तयार गरेको थियो । १ सय १३ बल खेल्ने क्रममा केनले ११ चौका र १ छक्का प्रहार गरेका थिए ।

ओपनर जोर्डन निलले ३१, म्याकबेथले २७, म्याकनेलीले २३, फिलिपुस ले रोक्सले १३ रन बनाए भने अन्य ब्याटर चल्न सकेनन् ।बंगलदेशका मरुफ मृधा र शेख पेभेज जीवोनले समान २, रोहानत डोलहा ब्रोसन, मोहम्मद राफि उज्जमन रफी र मफुजुर रहमान रब्बीले समान २ विकेट लिए । आयरल्यान्डले पहिलो खेलमा अमेरिकालाई हराएको थियो ।