काठमाडौं (हाम्रो खेलकुद) – कप्तान रोहित कुमार पौडेलले संघर्षपूर्ण अर्धशतक प्रहार गरेपछि नेपाल एपिएफ क्लबले प्रधानमन्त्री कप २०२४ अन्तर्गत त्रिभुवन आर्मी क्लबलाई १ सय २२ रनको प्रतिस्पर्धात्मक लक्ष्य दिएको छ ।

भैरहवास्थित सिद्धार्थनगर रंगशालामा टस हारेपछि पहिलो ब्याटिङको निम्तो पाएको एपिएफले ३२.४ ओभरमा अलआउट हुँदै १ सय २१ रन जोड्यो । खराब मौसमका कारण ३६ ओभरमा घटाइएको खेलमा एपिएफले सुरुवाती दुवै ओभरको पहिलो बलमा क्रमश: ओपनर प्रज्वल शाही र पुरन विक (३) लाई गुमाएको थियो ।

दोस्रो ओभरमा ब्याटिङका लागि आएका रोहित ३३ औं ओभरमा नवौं विकेटको रुपमा पेभेलियन फर्केका थिए । उनले १ सय ३ बलको सामना गर्दै ५९ रन जोडे । स्पिनर बसिर अहमदको बलमा ठूलो सट खेल्ने धुनमा क्याच आउट हुनुअघि उनले २ चौका र २ छक्का प्रहार गरे ।

एकतर्फ लगातार विकेट झर्दा रोहितले अर्को एण्डबाट विकेट जोगाएर रन बटुलेका थिए । एपिएफका लागि सुमित महर्जनले १४ र भुवन कार्कीले १६ रन जोड्नुबाहेक अन्य खेलाडीले दोहोरो अंकमा रन जोड्न सकेनन् ।

आर्मीका लागि सोमपाल कामीले ३ विकेट लिँदा अभिनाश कर्णले २ तथा विवेक यादव, साहब आलम र बसिर अहमदले १-१ सफलता प्राप्त गरे ।