आर्मीको चौथो जित

काठमाडौं (हाम्रो खेलकुद) – त्रिभुवन आर्मी क्लबले प्रधानमन्त्री कप २०२४ अन्तर्गत लुम्बिनी प्रदेशलाई पराजित गरेको छ ।

भैरहवास्थित सिद्धार्थनगर रंगशालामा खराब मौसमका कारण २६ ओभरमा घटाइएको खेलमा आर्मीले ६५ रनको जित दर्ता गरेको हो । आर्मी यस जितसँगै ६ खेलमा ८ अंकका साथ तेस्रो स्थानमा उक्लेको छ । लुम्बिनी १ जितका साथ नवौं स्थानमा छ ।

टस हारेर पहिलो ब्याटिङको निम्तो पाएको आर्मीले २६ ओभरमा ७ विकेट गुमाउँदै १ सय ७० रन जोडेको थियो । ओपनर इमरान शेखले ७० बलमा ७ चौका र १ छक्कसहित नटआउट ६७ रन जोड्दै आर्मीलाई बलियो स्कोरसम्म पुर्याए ।

इमरानलाई कप्तान विनोद भण्डारीले २५ बलमा ३४ रन जोड्दै साथ दिए । उनले ४ चौका र १ छक्का प्रहार गरेका थिए । भिम सार्कीले ४० बलमा १-१ चौका र छक्कासहित २४ रन जोडे । नरसार्की र मोहमद हुसेनले २-२ विकेट लिए ।

जवाफमा लुम्बिनीले २६ ओभरमा ८ विकेट गुमाएर १ सय ५ रन मात्र जोड्न सक्यो । कृष्ण कार्कीले नटआउट ३५ रन जोड्दै लुम्बिनीको इनिङ सम्हाले । कुशल मल्लले ६ ओभरमा ११ रन खर्चेर ४ विकेट लिएका थिए ।