सुबास हुमागाईं, काठमाडौं

आइसीसी क्रिकेट विश्वकप लिग-२ को सुरुवाती दुई चरणको खेल तालिका सार्वजनिक हुँदा क्यानडाका कप्तान साद बिन जफरले आफू निराश भएको बताए । एकदिवसीय अन्तर्राष्ट्रिय (ओडीआई) मान्यता फिर्ता पाएपछि क्यानडाले लिग-२ अन्तर्गत नेपालसँगै ८ टोलीसँग सिरिज खेल्नेछ । तर नेपाल आउने तालिका नहुँदा उनी दुखि थिए ।

नेपाल र क्यानडाबीच लिग-२ अघि नै द्विपक्षीय सिरिज हुने पक्का भएपछि भने आफू खुसी भएको उनले बताए । सिरिजको पूर्वसन्ध्यामा आयोजित पत्रकार सम्मेलनमा कप्तान जफरले नेपालको खेल टिभीमा नियमित हेर्ने गरेको र यहाँ खेल्न निकै उत्साहित रहेको अनुभव साटे ।

‘हामीले नेपालले खेलेको खेल हेरिरहेका हुन्छौं । सधैं दर्शकको बाक्लो उपस्थिति देख्दा यो वातावरणमा खेल्दा कस्तो अनुभव होला भन्ने हुन्थ्यो । जब लिग-२ को तालिका आयो, नेपालमा हाम्रो खेल नदेख्दा दुखि थिएँ । तर दुई बोर्डको छलफलपछि यो सिरिज खेल्न पाउँदा निकै खुसी छु ।’

‘हामी भर्खर ओडीआई सर्कलमा फर्केका छौं । हामी अबको ३ वर्षको तयारी नेपालमा आएर सुरु गर्न पाउँदा उत्साहित छु । नेपालभन्दा राम्रो अवसर सायदै थियो । मलाई लाग्छ हामीले प्रतिस्पर्धात्मक खेल प्रस्तुत गरेर राम्रो क्रिकेट देखाउनेछौं ।’

क्यानडाले यसै साता हङकङ र मलेसियासँग त्रिकोणात्मक सिरीज खेलेर आएको थियो । हङकङमा भएको सिरिजमा मलेसियासँग फाइनलमा पराजित भएपनि कप्तान जफरले त्यस नतिजा प्रयोगको रुपमा लिएको बताए ।

‘हामीले हङकङ सिरिजमा प्रयोग गरेका थियौं । हाम्रो लागि त्यो तयारी क्याम्प मात्र थियो । ६ नयाँ खेलाडीलाई अवसर दिएका थियौं । समग्रमा हङकङ सिरिज हाम्रो लागि राम्रो भयो ।’

कप्तान जफरले नेपाल टुरका लागि टोलीमा केहि चोटको समस्या रहेपनि बिस्तारै खेलाडी फर्कने बताए । बायाँ हाते बलर कलिम साना चोटबाट संघर्ष गरिरहेका छन् । तर नेपाल आएका खेलाडी उपलब्ध मध्यका उत्कृष्ट रहेको उनले बताए ।

प्रशिक्षक पुबुदु दासानायके नेपालको पछिल्लो लिग-२ यात्रामा टोलीको प्रशिक्षक थिए । झन्डै ७ महिने नेपालको बसाई उनको लागि भने यादगार रहेन । कठिन समयमा प्रशिक्षक बनेका उनले त्यसपछि परिवारसँग समय बिताउने कारण देखाउँदै क्यानडा फर्केका थिए ।

पुबुदु क्यानडा टोलीलाई नेपाल लिएर आउँदा उत्साहित देखिए । ‘हामीलाई निमन्त्रणा गरेकोमा क्यानलाई धन्यवाद दिन चाहन्छु । हामी दशकअघि विश्व वरीयतामा १२ औं स्थानमा थियौं । बिचमा राम्रो समय रहेन तर अब ओडीआईमा फर्किएका छौं ।’

‘हाम्रो लिग-२ को पहिलो सिरिज यूएईमा छ । त्यसका लागि नेपाल हाम्रो लागि तयारी गर्न सबैभन्दा राम्रो ठाउँ हो । मलाई नेपालको समर्थक र वातावरणबारे राम्रो जानकारी छ ।’

‘आशा छ नेपालले पनि छिट्टै क्यानडा भ्रमण गर्नेछ । हामी नेपालसँग लिग-२ बाहिर पनि सिरिज खेल्न चाहन्छौं । यसले दुवै टोलीलाई फाइदा पुग्नेछ ।’

पुबुदुले नेपाल फर्कंदा आफ्नो लागि सधैं विशेष रहने बताए । ‘नेपाल फर्कनु सधैं विशेष हुन्छ । जस्तो अवस्था भएपनि नेपालको खेल हेर्दा आनन्द हुन्छ । मैले नेपालको गत वर्षको यात्रा पनि पछ्याएको थिएँ । नेपालको प्रगति देख्दा निकै खुसी लाग्छ । सहि ठाउँमा सहि व्यक्ति जस्तो पारस, मोन्टि, विनोद एकसाथ हुँदा राम्रो भएको छ ।’

पुबुदुले नेपाली समर्थकमाझ खेल्नु हरेक टोलीका लागि राम्रो अनुभव रहेको बताउँदै क्यानको निमन्त्रणा पाउँदा निकै उत्साहित भएको अनुभव साटे ।

भिडियो हेर्नुहोस् :