एजेन्सी – दक्षिण अफ्रिका विरुद्धको घरेलु टेस्ट शृंखलाको दोस्रो खेलमा न्यूजिल्यान्ड जित तर्फ अग्रसर रहेकाे छ । जितका लागि २ सय ६७ रनको लक्ष्य पछ्याइरहेको न्यूजिल्यान्डलाई तेस्रो दिनको खेल सकिँदा दोस्रो इनिङमा ४०-१ को अवस्थामा २ सय २७ रन चाहिएको छ ।

ओपनर टम ल्याथम २१ रन बनाएर क्रिजमा छन् । अर्का ओपनर डेभोन कन्वे १७ रन बनाएर तेस्रो दिनको अन्तिम बलमा डेन पिइड्टको बलमा आउट भए ।

त्यसअघि पहिलो पहिलो इनिङमा टस जितेर ब्याटिङ गरेको दक्षिण अफ्रिका २ सय ४२ रनमा सिमित भएको थियो । दक्षिण अफ्रिकाका लागि रुआन डे स्वार्डटले सर्वाधिक ६४ रन बनाएका थिए । यस्तै डेविड बेडीनगमले ३९ र सन भोन बर्गले ३८ रन बनाएका थिए । न्यूजिल्यान्डका लागि पहिलो इनिङमा विलियम ओरोउर्कले ४ तथा रचिन रविन्द्रले ३ विकेट लिएका थिए ।

त्यसपछि पहिलो इनिङमा ब्याटिङ गरेको न्यूजिल्यान्ड २ सय ११ रनमा समेटियो । न्यूजिल्यान्डलाई सस्तैमा समेट्न डेन पिइड्टले ५ विकेट लिएका थिए । यस्तै डेन पिटरसनले ३ विकेट लिए ।

न्यूजिल्यान्डका लागि केन विलियमसनले सर्वाधिक ४३ रन बनाएका थिए । यस्तै टम ल्याथमले ४० तथा विल यङले ३६ रन बनाए ।

३१ रनको अग्रता साथ दोस्रो इनिङमा ब्याटिङ सुरु गरेको दक्षिण अफ्रिका २३५ रन मात्र बनाउन सक्यो । बेडिनगमले ११० रनको शतकीय इनिङ खेल्दा किगन पिटरसनले ४३ रनको योगदान गरे । विलियम ओरोउर्कले दोस्रो इनिङमा भने ५ विकेट लिन सफल भए ।

दुई टेस्ट शृंखलाको पहिलो टेस्ट न्यूजिल्यान्डले २८१ रनको फराकिलो अन्तरले जितेको थियो । घरेलु टि-२० एसए-२० चलिरहेको अवस्थामा दक्षिण अफ्रिकाले कमजोर टोली न्यूजिल्यान्ड भ्रमणका लागि पठाएको छ ।