काठमाडौं (हाम्रो खेलकुद) – एसीसी महिला प्रिमियर कप २०२४ अन्तर्गत दोस्रो सेमिफाइनलमा नेपालले मलेसियाविरुद्ध टस जितेर ब्याटिङ गर्ने निर्णय लिएको छ ।

बायुमास ओभलमा हुने खेलका लागि कप्तान इन्दु वर्माले पहिलो ब्याटिङ गर्ने निर्णय लिँदा टोलीमा दुई परिवर्तन पनि भएको छ । स्पिनर संगीता राई र उपकप्तान विन्दु रावल टोलीमा आएका छन् । अश्मिना कर्माचार्य र पुजा महतोलाई बाहिर राखिएको छ ।

नेपालको प्लेइङ ११:

कविता कुँवर, सिता रानामगर, इन्दु वर्मा, रुविना क्षेत्री, अप्सरी बेगम, डली भट्ट, कविता जोशी, काजल श्रेष्ठ, विन्दु रावल, रोमा थापा, संगीता राई

नेपालले सेमिफाइनल जिते फाइनलमा यूएईको सामना गर्नेछ । आज सम्पन्न निकै रोमान्चक सेमिफाइनलमा यूएईले ४ रनको जित दर्ता गर्दै प्रिमियर कपको फाइनलमा स्थान पक्का गरेको हो ।

मलेसियाको बायुमास ओभलमा यूएईले प्रस्तुत गरेको ७१ रनको लक्ष्य पछ्याउने क्रममा थाइल्याण्ड ६६ रनमा अलआउट भयो । यूएईले २० ओभरमा ७ विकेट गुमाएर ७० रन जोडेको थियो । जवाफमा ७१ रनको लक्ष्य पछ्याउँदा थाइल्याण्ड ७.५ ओभरमा १५-५ को दयनीय स्थितिमा पुगेको थियो ।

तर छैटौं विकेटका लागि ३५ रनको साझेदारी हुँदा टोली खेलमा फर्कियो । अन्तिम ३ ओभरमा जितका लागि १४ रन आवश्यक हुँदा २ विकेट बाँकी रहेपनि थाइल्याण्ड पराजित हुन पुग्यो ।

अन्तिम ओभरमा ६ रन चाहिएको अवस्थामा पहिलो बलमा १ रन जोडेपछि दोस्रो बलमा थाइल्याण्डले अन्तिम विकेट क्याच आउट हुँदै गुमायो । यससँगै थाइल्याण्डले सेप्टेम्बरमा हुने एसिया कप गुमाउने भएको छ ।