एजेन्सी – भारतको शीर्ष श्रेणी क्रिकेट प्रतियोगिता रणजी ट्रफी अन्तर्गत मुम्बईबाट पुछारका दुई ब्याटरले शतक बनाएका छन् । नेपालले अर्को महिना मैत्रीपूर्ण सिरिज खेल्न लागेको बरोडाविरुद्ध दुर्लभ उपलब्धि हासिल गरेका हुन् ।

मंगलबार सम्पन्न दोस्रो क्वाटरफाइनल अन्तर्गत बरोडाविरुद्ध खेलको पाँचौ दिन दशौं नम्बरमा ब्याटिङ गरेका तनुश कोटिया र एघारौं नम्बरमा आएका तुषार देशपाण्डेले शतक प्रहार गरेका हुन् । चौथो दिन ब्याटिङ सुरु गरेका यी दुईले अन्तिम विकेटका लागि २ सय ३२ रनको साझेदारी समेत निर्माण गरे ।

चौथो दिनको खेल सकिँदा मुम्बई ३७९-९ को स्थितिमा थियो । तनुश ३२ रन र तुषार २३ रनमा खेलिरहेका थिए । तर पाँचौ दिन आक्रामक ब्याटिङ गरेका यी दुवैले शतक पूरा गरे ।

तुषार १ सय २९ बलमा १० चौका र ८ छक्कासहित १ सय २३ रन जोड्दै निनाद रथ्बाको बलमा क्याच आउट भए । तनुष १ सय २९ बलमा १० चौका र ४ छक्कासहित १ सय २० रनमा नटआउट रहे ।

मुम्बईले दुवै शतकको सहयोगमा आफ्नो दोस्रो इनिङमा ५ सय ६९ रनको विशाल योगफल खडा गरेको थियो । ओपनर हार्दिक तमोरेले पनि १ सय १४ रनको इनिङ खेलेका थिए । कप्तान अजिंक्या रहाने भने शून्यमै बोल्ड भएका थिए ।

मुम्बईले खेल पहिलो इनिङको अग्रताको आधारमा जित्दै सेमिफाइनलमा स्थान बनायो । मुम्बईले पहिलो इनिङमा ३ सय ८४ तथा बरोडाले ३ सय ४८ रन जोडेको थियो । बरोडा दोस्रो इनिङमा १२१-३ को अवस्थामा हुँदा खेल टुंगिएको हो ।

नेपालले अर्को महिना बरोडा र गुजरातसँग नै त्रिकोणात्मक टि२० सिरिज खेल्दैछ ।