हेटौंडा ( हाम्रो खेलकुद) – पर्साको नेसनल इन्फोटेक कलेजले अन्तरकलेज क्रिकेट प्रतियोगिताको उपाधि जितेको छ । हेटौंडा जेसीजको आयोजनामा हेटौंडा–४ स्थित हुप्रचौरमा मंगलबार भएको फाइनलमा हेटौंडा स्कुल अफ म्यानेजेमेन्टलाई ४ विकेटले पराजित गर्दै नेसनल अष्टकुमारी स्मृति टी–२० क्रिकेट प्रतियोगिता च्याम्पियन भएको हो ।

पहिला ब्याटिङ गर्दै म्यानेजमेन्टले २० ओभरमा ८ विकेट गुमाएर १ सय २० रन बनाएको थियो । म्यानेजमेन्टका लागि युविन बुढाथोकीले ४९ रनको योगदान गरेका थिए ।

जवाफी ब्याटिङ गरेको नेसनलले १९.१ ओभरमा ६ विकेट गुमाएर १ सय २१ रनका साथ लक्ष्य पूरा गरेको थियो । टोलीका लागि मन्थन यादवले सर्वाधिक ४३ रन जोडेका थिए । मन्थन खेलको म्यान अफ दी म्याच समेत घोषित भए ।

प्रतियोगितामा वीरगञ्जका मन्थन यादव सर्वोत्कृष्ट खेलाडी घोषित भए । नारायणी कलेज हेटौंडाका अस्मितकुमार मण्डल उत्कृष्ट बलर र म्यानेजमेन्टका युविन बुढाथोकी उत्कृष्ट ब्याटर घोषित भए ।

उपाधि विजेता नेसनलले ५० हजार र मेनेजमेन्टले २५ हजार रुपैयाँ प्राप्त गरेयो । आयोजक हेटौंडा जेसीजका अध्यक्ष विकेशलाल श्रेष्ठ एवम् हेटौंडा उपमहानगरपालिकाका उपमेय राजेश बानियाँ विजेता, उपविजेता र सर्वोत्कृष्ट र उत्कृष्ट खेलाडीलाई पुरस्कृत गरे ।

प्रतियोगितामा हेटौंडा, चितवन, बारा र पर्साका गरी ६ टोलीको सहभागिता थियो । अर्को वर्ष सहभागी टोली र पुरस्कार राशीमा बृद्धि गर्ने योजना रहेको प्रतियोगिता संयोजक सुमन अर्यालले जानकारी दिए ।