मस्कट (हाम्रो खेलकुद) – ओमानमा जारी एसीसी प्रिमियर कपमा कतारले दोस्रो जित दर्ता गरेको छ । नेपाल रहेकै समूह ए मा रहेको कतारले साउदी अरब माथि १५ रनको जित दर्ता गरेसँगै नेपाल समुहमा शीर्ष स्थानमा रहने पक्का भएको छ । 

समूह ए मा कतार ४ खेलमा ४ अंक सहित स्थानमा दोस्रो स्थानमा छ। नेपाल ३ खेलमा ६ अंक सहित शीर्ष स्थानमा हुनुका साथै सेमिफाइनलमा पुगिसकेको छ । क्रमश: तेस्रो, चौथो र पुछारमा रहेका साउदी अरब, मलेसिया र हङकङको समान २ अंकमा छन् ।

साउदी अरबले नेपाल विरुद्ध र मलेसियाले हंङकङ विरुद्ध खेल्न बाँकी रहेको छ । यो सँगै दोस्रो स्थानमा रहेर अन्तिम ४ मा पुग्ने टोलीको छिनोफानो रन रेटका आधारमा हुने भएको छ । कुनै पनि टोलीले ६ अंक बनाउन नसक्ने भएपछि नेपाल समूह विजेता बनेको छ ।

अल अमेरातमा टस जितेर पहिला ब्याटिङ गरेको कतारले निर्धारित २० ओभरमा ९ विकेट गुमाउँदै १ सय ५३ रन बनायो । कतारका लागि कप्तान मुहम्मद तन्भिरले ४४ बल खेल्दै ३ चौका सहित सर्वाधिक ४३ रन बनाए । यस्तै शाहजैब जमिलले २७ बलमा ३८ रन बनाए भने सक्लेन अर्शदले १३ बलमा २३ रन जोडे ।

साउदीका लागि इश्तियाक अहमद, उस्मान खालिद र उस्मान नाजिबले २-२ विकेट लिए भने अतिफ-उर-रहमानले १ विकेट लिए ।

जवाफमा साउदी अरबले २० ओभरमा ८ विकेटको क्षतिमा १ सय ३८ मात्र बनाउन सक्यो । साउदीका लागि वाजी उल हसनले ४० बलमा ५७ रन र कप्तान हिशाम शैखले ३२ बलमा २० रन बनाए । यस्तै काशिफ अब्बासले १७ र जैन उल अबिदीनले १६ रन जोडे ।

कतारलाई जित दिलाउन गयान मुनाविरा, मुसावर शाह र हिमांशु राथोडले २-२ तथा अमिर फारुक र मुहम्मद जाबिरले १-१ विकेट लिए ।      

–कतारको दोस्रो जित हुनुपर्नेमा अन्यथा भएकोले सच्चाइएको छ।