काठमाडौं (हाम्रो खेलकुद) – आइसीसी टि२० विश्वकप २०२४ खेल्नका लागि नेपाली राष्ट्रिय पुरुष क्रिकेट टोली अमेरिका पुगेको छ ।

विश्वकपको तयारीका लागि नेपाली टोली एक महिनाअगावै अमेरिका प्रस्थान गरेको हो । नेपालबाट प्रस्थान गर्ने विमानमा बिजनेस क्लास टिकट अभाव भएपछि दुई समूहमा टोली नेपालबाट प्रस्थान गरेको थियो । शनिबार राती प्रस्थान गरेको पहिलो समूह फ्लोरिडा पुगिसकेको छ । यस्तै दोस्रो समूह आइतबार दिउँसो त्यसतर्फ प्रस्थान गरेको हो ।

नेपालले फ्लोरिडामा केही दिन प्रशिक्षण गरेर वेस्ट इन्डिजको सेन्ट भिन्सेन्टमा जानेछ । त्यहाँ गएर विश्वकप नै हुने मैदानमा नेपालले प्रशिक्षण र अभ्यास खेल खेल्नेछ । त्यसपछि टोली अन्तिम तयारीका लागि टेक्सासको ह्युस्टन आउने तयारी छ । नेपालले विश्वकपअघि अन्तिम वार्म अप खेल भने डालासमै खेल्नेछ । टोलीको यात्राको यकिन मिति भने केहि दिनमा सार्वजनिक हुनेछ ।

नेपालले विश्वकपका लागि यसअघि नै १५ सदस्यीय अन्तिम टोली घोषणा गरिसकेको छ । त्यस्तै टोलीमा ४ वैकल्पिक खेलाडी पनि रहेका छन् । वैकल्पिक खेलाडी भने हाल टोलीसँग जाने छैनन् ।

अन्तिम टोली :

रोहित कुमार पौडेल (कप्तान), दीपेन्द्र सिंह ऐरी, कुशल भुर्तेल, आसिफ शेख, अनिल शाह ,सन्दीप जोरा, कुशल मल्ल ,गुलशन झा, सोमपाल कामी ,करण केसी, अभिनाश बोहोरा , कमल सिंह ऐरी, प्रतिश जिसी ,ललित नारायण राजवंशी, सागर ढकाल

वैकल्पिक खेलाडी: विवेक यादव, विनोद भण्डारी, आकाश चन्द, लोकेश बम

अफिसियल:

मोन्टि देशाइ (मुख्य प्रशिक्षक), वसन्त शाही (सहायक प्रशिक्षक), नन्दन फाद्निस (क्रिकेट कन्सल्टटेन्ट), रड इस्टविक (बलिङ कन्सल्टेन्ट), रमण शिवाकोटी (एनालिस्ट), विक्रम न्यौपाने (फिजियो), अब्दुल सतार (स्ट्रेन्थ एण्ड कन्डिसन), प्रदिप मजगैया (व्यवस्थापक)