काठमाडौं (हाम्रो खेलकुद) – सिजी फुड्स नेपाल लिमिटेडको उत्पादन वाई वाईले नेपाली राष्ट्रिय यु-१९ क्रिकेट टोली सहित समग्र नेपाली क्रिकेट विकासका लागि नेपाल क्रिकेट संघ (क्यान) लाई नगद सहयोग गर्ने घोषणा गरेको छ ।

सोमबार काठमाडौंमा भएको स्पेसल एडिसन वाइ वाइ चाउचाउ सार्वजनिक गर्ने क्रममा आयोजना भएको पत्रकार सम्मेलनमा सो सहयोगको घोषणा भएको हो ।

सिजी फुड्सले क्यानलाई कुल ६० लाख रुपैयाँ सहयोग गर्ने घोषणा भएको हो । विगत दुई दशकदेखि नेपाली क्रिकेटसँग जोडिएको सिजी फुड्सले नेपाली पुरुष टोली दोस्रो पटक विश्वकप पुगेको अवसरमा स्पेसल एडिसन चाउचाउ बजारमा ल्याएको घोषणा गर्दै वाइ वाइले महिला अन्डर-१९ क्रिकेट टिमलाई समेत प्रायोजन वापत रू. ३० लाख तथा अन्य क्रिकेट गतिबिधि संचालनका लागि रू.३० लाख गरि जम्मा रू. ६० लाख नेपाल क्रिकेट संघलाई सहयोग गर्नेछ ।

पत्रकार सम्मेलनका अवसरमा चौधरी ग्रुपका प्रबन्धक निर्देशक श्री निर्वाण चौधरीको उपस्थितीमा क्यानका सचिव श्री पारस खड्का र सिजी फुड्सका सिइओ श्री प्रदिप पुडासैनीले यस सम्वन्धी सम्झौता पत्रमा हस्ताक्षर गरेका थिए ।

सिजी फुड्स नेपालले नेपाली राष्ट्रिय टिमलाई हार्दिक बधाई एवं शुभकामना व्यक्त गर्दै विश्वकपमा सहभागी राष्ट्रिय टिमलाई प्रोत्साहन स्वरुप सुपर-८ मा पुग्न सफल भएमा रु ३० लाख तथा समग्र नेपाली टिमको मनोबल उच्च बनाउने उद्देश्यले प्रत्येक रन वापत रू. १ हजार, प्रत्येक चौका वापत रू.८ हजार, प्रत्येक छक्का वापत रू. १२ हजार, प्रत्येक विकेट वापत रू. १५ हजार, प्रत्येक अर्धशतक वापत रू. ५० हजार, प्रत्येक शतक वापत रू. १ लाख र नेपाली टिमको प्रत्येक जितमा रू. १ लाख ५० हजार रूपैया नगद उपलब्ध गराउने घोषणा गरि सकेको छ ।

यसका साथै नेपाल दोस्रो पटक विश्वकपमा सहभागी हुन सफल भएको ऐतिहासिक क्षणलाई अविष्मरणीय बनाउने उद्देश्य तथा नेपाली क्रिकेट टिमलाई प्रोत्साहन र समर्थन स्वरुप ‘वाइ वाइ क्रिकेट स्पेसल एडिसन प्याकेट’ बजारमा ल्याएको हो ।

वाइ वाइको यस विशेष प्याकेटले नेपाली क्रिकेट टिमलाई थप प्रोत्साहन तथा समस्त नेपाली क्रिकेटप्रेमिहरूमा थप उत्साह ल्याउने विश्वास कम्पनीले लिएको छ ।