default_image

2 weeks ago

June 11, 2024

‘श्रीलंकालाई हराउने अवसर छ’ – कप्तान रोहित पौडेल

3812 views

0 Bookmark

सुबास हुमागाईं, फ्लोरिडा

नेपाली राष्ट्रिय क्रिकेट टोलीले २०२४ आइसीसी मेन्स टि२० विश्वकपको दोस्रो खेलमा मंगलबार श्रीलंकाको सामना गर्दैछ । नेपाली समयअनुसार बुधबार विहान ५:१५ बजे फ्लोरिडास्थित ब्रोआर्ड काउन्टी रंगशालामा खेल हुँदैछ ।

खेलको पूर्वसन्ध्यामा आयोजित पत्रकार सम्मेलनमा कप्तान रोहित कुमार पौडेलले श्रीलंकाविरुद्ध खेल नेपालको लागि टेस्ट राष्ट्रविरुद्ध जित हासिल गर्ने पहिलो अवसरको रुपमा रहेको बताए । उनले विश्वकपमा अन्य एसोसिएट टोलीले ल्याएको नतिजाले पनि नेपालको मनोबल बढेको अभिव्यक्ति दिए ।

‘यदि विश्वकप हेर्छौं भने एसोसिएट टिमले टेस्ट राष्ट्रहरुलाई हराएका छन् । यसले हाम्रो मनोबल बढेको छ, अझ विशेष भोलीको खेलअघि । हामी जित निकाल्न सकिन्छ भन्ने विश्वासका साथ नै अघि बढेका छौं । हामीले यसका लागि २ महिनादेखि विश्वकप लक्षित तयारी गरेका छौं र डेढवर्षदेखि नियमित क्रिकेट खेलेका छौं । हामीमा सधैं विश्वास छ ।’

रोहितले श्रीलंकाको स्पिनरहरु राम्रो रहेपनि नेपाल तयार रहेको बताए । ‘श्रीलंकामा राम्रा स्पिनर छन् जसले विश्वभर क्रिकेट खेलेका छन् । हामीले त्यो पक्षमा ध्यान दिनुपर्छ । तर सबै २० टोली हेर्दा सन्तुलित नै देखिन्छन् । हामीले भोली गएर विश्वसामु आफ्नो प्रतिभा देखाउने हो ।’

रोहितले अमेरिकामा भइरहेको विश्वकप खेलमा राम्रो स्कोर नबनेपनि फ्लोरिडामा फरक अवस्था हुने बताए । ‘न्युयोर्क र डालासमा भन्दा यहाँ फरक पिच छ जस्तो लाग्छ । विकेट पनि राम्रो छ र क्युरेटरसँग छलफलमा पनि यो कुरा भएको थियो । यसअघि वार्म अप खेलमा पनि १ सय ८० को स्कोर बनेको छ । त्यसैले हामी खेलको प्रतिक्षामा छौं,’ रोहितले भने ।

कप्तान पौडेलले नेपालले ओपनरमा परिवर्तन गर्ने सम्भावना नरहेको बताउँदै मैदानको अवस्था अनुसार टोली छनोट हुने बताए । ‘भोली पनि वर्षाको सम्भावना रहेको छ । अब खेल हुँदा मैदानको अवस्थाले नै टोली छनोटमा निर्णय लिनेछौं । हाललाई भने हामीले ओपनरमा विश्वास कायम राख्ने नै सोच बनाएका छौं,’ उनले थपे ।

विश्वकपअघि श्रीलंकाले फ्लोरिडामै दुई वार्मअप खेल खेलेको थियो । पहिलो खेलमा नेदरल्यान्ड्ससँग हारेको श्रीलंकाले दोस्रोमा आयरल्यान्डलाई पराजित गरेको थियो । नेपालले भने एकमात्र वार्मअप खेलमा क्यानडासँग हार बेहोरेको थियो ।

नेपालले यसपछि समूहको अन्तिम दुई खेल भने सेन्ट भिन्सेन्टको आर्नस भेल रंगशालामा खेल्नेछ । श्रीलंकाविरुद्ध नेपाल १४ सदस्यीय टोलीसहित उत्रनेछ । प्रतिश जिसीको स्थान सन्दीप लामिछानेले लिएकाले टोलीमा १४ सदस्य मात्र छनोटका लागि योग्य हुनेछन् । वेस्ट इन्डिज पुगेपछि भने सन्दीप टोलीमा जोडिनेछन् ।

श्रीलंकाले विश्वकपको सुरुवाती दुई खेलमा दक्षिण अफ्रीका र बंगलादेशसँग हार बेहोरेको थियो । यता नेपाल भने नेदरल्यान्ड्ससँग पराजित भएको हो । श्रीलंकाले यो खेल गुमाए विश्वकपबाट बाहिरिनेछ । खेलको अघिल्लो दिन तीव्र गतिका बलिङ प्रशिक्षक आकिब जावेदले नेपाललाई कमजोर नआँक्ने बताए ।

‘विश्वकपमा नतिजा देखिरहेका छौं । सबै टोली उस्तै छन् । हामीले भोलिको खेललाई अर्को एक महत्त्वपूर्ण खेलको रुपमा नै लिएका छौं । नेपालले पनि राम्रो क्रिकेट खेल्छ ।’

‘हाम्रो बलिङ आक्रमण केहि राम्रो छ । हारमा पनि राम्रो प्रदर्शन भएको छ । तर यो विश्वकपमा मैदानको अवस्था बुझेर खेल्न सके मात्र सहज हुन्छ । त्यसैले हामीले भोली त्यो बुझेर आफ्नो रणनीति प्रयोग गर्नुपर्छ ।’

नेपाल र श्रीलंकाले सिनियर क्रिकेटमा पहिलो पटक एक अर्काको सामना गर्दैछन् । उमेर समूहमा भने पटक पटक भेट भएको इतिहास छ । सन् २०१६ को यू१९ एसिया कपमा कामिन्डु मेन्डिसको कप्तानीमा रहेको श्रीलंकासँग नेपाल १ रनले पराजित भएको थियो । उक्त खेलमा दीपेन्द्रसिंह ऐरीले ९० रनको इनिङ खेलेका थिए । यी दुवै अहिले विश्वकप टोलीमा छन् । नेपालबाट भने उक्त खेलमा आसिफ शेख, कमलसिंह ऐरी र सन्दीप लामिछाने पनि खेलेका थिए ।

June 23, 2024

इङ्ल्यान्ड टि ट्वान्टी विश्वकपको सेमिफाइनलमा

एजेन्सी – अमेरिका विरुद्ध सानदार जित दर्ता गर्दै इङ्ल्यान्ड आइसिसी टि ट्वान्टी विश्वकप २०२४ को सेमिफाइनलमा प्रवेश गर्ने पहिलो टोली बनेको छ । इङ्ल्यान्डले आइतबार अमेरिकालाई १० विकेटले हराउँदै अन्तिम चारको यात्रा तय गरेको हो । अमेरिकाले दिएको १ सय १६ रनको लक्ष्य इङ्ल्यान्डले ९.४ ओभरमै कुनै विकेट नगुमाई भेटायो । इङ्ल्यान्डको जितमा कप्तान जस […]

June 23, 2024

अष्ट्रेलियाविरुद्ध अफगानिस्तानको पहिलो जित

एजेन्सी – अष्ट्रेलिया माथि सानदार जित दर्ता गर्दै अफगानिस्तानले आइसिसी टि-ट्वान्टी विश्वकपको सेमिफाइनलमा पुग्ने सम्भावना कायम राखेको छ । आफ्नो इतिहासमा अष्ट्रेलिया विरुद्ध पहिलो जित दर्ता गर्ने क्रममा अफगानिस्तानले शनिबार २१ रनको जित हासिल गरेको हो । अफगानिस्तानको जित पछि सुपर एट समूह १ बाट सेमिफाइनल पुग्ने दौड रोचक बनेको छ । भारतको २ खेलबाट […]

June 22, 2024

बंगलादेशलाई हराउँदै भारत सेमिफाइनल नजिक

एजेन्सी – भारत आइसिसी टि-२० विश्वकपको सेमिफाइनलको निकै नजिक पुगेको छ । सुपर एट चरण अन्तर्गत बंगलादेश माथि ५० रनको फराकिलो जित दर्ता गर्दै भारत सेमिफाइनलको निकै नजिक पुगेको हो । आईतवार बिहान अष्ट्रेलियाले अफगानिस्तान माथि जित दर्ता गरेका भारतको सेमिफाइनलमा स्थान पक्का हुनेछ । सो नतिजा आएमा भारत र अष्ट्रेलिया बीचको खेलले समूह विजेता […]

Success

Thank you for your time.