चितवन (हाम्रो खेलकुद)– हिमालयन क्रिकेट एकेडेमी (एचसिए) ले एक्सपर्ट स्कुल क्रिकेट लिग चितवन २०१७ आयोजना गर्ने भएको छ । देशभरका ८ मुख्य शहरमा हुने प्रतियोगिता माघ २८ गतेबाट चितवनमा पनि हुन लागेको हो । विशाल चौकस्थित नौ बिगाहा मैदानमा पहिलो चरणका खेल हुने बताइएको छ ।
प्रतियोगितामा पहिलो चरणमा चितवन र यस आसपासका स्कुलहरूले सहभागिता जनाउने छन् । यसको विजेता अन्तिम चरणलाई छानिनेछ । पहिलो चरणमा यस क्षेत्रको विजेतालाई १ लाख र उपविजेतालाई ५० हजार बराबरको खेल सामग्री प्रदान गरिने छ । चितवन र आसपासका १२ भन्दा बढी विद्यालयले भाग लिने आयोजकको दाबी छ ।
प्रतियोगिताका उत्कृष्ट १५ खेलाडीलाई सिसिआरसी कलेजमा अध्ययन र एचसिएमा प्रशिक्षण व्यवस्था मिलाइने आयोजक एनसिएका संस्थपक सुवास प्रधानले जानकारी दिए । उत्कष्ट खेलाडीलाई खेल सामग्री प्रदान गर्नुका साथै अप्रिलमा बंगलादेश भ्रमणमा एक्सपोजर दिन तयारी रहेको प्रधानले बताए ।
पढेर मात्र होइन खेलेर पनि छात्रवृत्ति पाइन्छ भनेर अभिभावकलाई बुझाउने प्रयासका लागि प्रतियोगिता आयोजना गरिएको प्रधानले बताए । नेपाली क्रिकेटका लागि स्थानीय स्तरको प्रतियोगिता जरुरी भएकाले विद्यालय क्षेत्र रोजेको उनले थपे । माघ २० गतेदेखि कञ्चनपुरबाट प्रतियोगिता सुरु भएको छ । प्रतियोगिताको प्रायोजकमा एक्सपर्ट एजुकेसन एन्ड भिसा सर्भिसेज रहेको छ । त्यसका चितवन निर्देशक डिल्लीराम अधिकारीले प्रतियोगितालाई स्तरीय बनाउन आफ्नो संस्थाले सक्दो प्रयास गर्ने बताए ।
