काठमाडौं (हाम्रो खेलकुद) – श्रीलंकामा हुने वुमन्स एसिया कपको तयारीमा रहेको नेपाली महिला टोलीले मंगलबार अभ्यास खेल जितेको छ ।

तेस्रो अभ्यास खेलमा नेपाली टोलीले श्रीलंका वुमन्स डेभलप्मेन्टलाई २ रनले हराएको छ । यसअघिका सोही टोलीसँगको दुवै अभ्यास खेलमा नेपाल पराजित भएको थियो ।

१ सय १३ रनको लक्ष्य पछ्याएको श्रीलंका वुमन्स १९.५ ओभरमा सबै विकेट गुमाएर १ सय १० रन मात्र बनाउन सक्यो । टोलीका लागि भि बालासूर्याले ३ चौकाको सर्वाधिक ३८ रन बनाइन् ।

आर नेर्थान्जलीले २६ आर सेवान्दनीले १० रन जोडिन् । नेपालका लागि कविता जोशीले ३ , कृतिका मरासिनीले २ र कविता कुवँरले १ विकेट लिएकी थिइन् ।

त्यसअघि पहिले ब्याटिङ गरेको नेपालले ६ विकेटको क्षतिमा १ सय १२ रन बनाएको थियो । नेपालका लागि रुबिना क्षेत्रीले २६ बलमा ३ छक्का र १ चौकाको मद्दतमा ३७ रन बनाइन् । विन्दू रावलले ३१ बलमा १ चौका साथ २० रन जोडिन् ।

सिता रानामगरले १५, कप्तान इन्दु बर्माले ११ र सम्झना खड्काले १० रन बनाएकी थिइन् । श्रीलंका वुमन्सका लागि डि थेनाकोनेले २, आर सेवान्दी, एस इदुवारी र पी मेथासारीले समान १ विकेट लिएकी थिइन् ।

यसअघि नेपाल पहिलो खेलमा ३३ रन र दोस्रो खेलमा ४ विकेटले पराजित भएको थियो । श्रीलंकामा शुक्रबारदेखि देखि सुरु हुने एसिया कपमा नेपाल समूह ’ए’ मा छ। नेपाल रहेको समूहमा भारत, पाकिस्तान र युएई छन्।

नेपालले शुक्रबार युएईसँग खेल्दै प्रतियोगिताको सुरुवात गर्नेछ । नेपालले दोस्रो खेल पाकिस्तानसँग साउन ६ र भारतसँग साउन ८ गते खेल्नेछ ।