एजेन्सी – बंगलादेश क्रिकेट बोर्ड (बिसिबी) ले बिहीवार बंगलादेशी सेनाका चिफ अफ स्टाफ जनरललाई पत्र लेख्दै आगामी महिना सुरु हुने महिला टि ट्वान्टी विश्वकपका लागि सुरक्षाको माग गरेको छ ।

बिसिबीले सेनाका चिफ अफ स्टाफ जनरल वाकर–उज–जमानलाई पत्र लेख्दै सेप्टेम्बर २७ देखि अभ्यास खेलसँगै सुरु हुने टि‌ ट्वान्टी विश्वकप सञ्चालनका लागि सुरक्षाको प्रत्याभूति माग गरेको हो ।

अन्तर्राष्ट्रिय क्रिकेट परिषद् (आइसिसी) ले समेत बंगलादेशको अवस्थालाई नजिकबाट नियालिरहेको छ । आइसिसीले आयोजना स्थलको विकल्पहरूमा पनि विचार गरिरहेको बताइएको छ ।

यदि प्रतियोगिता सारिने भयो भने, बंगलादेश को समय मिल्ने एक देश को चयनमा आइसिसीले साचिरहेको छ । भारत, संयुक्त अरब इमिरेट्स (युएई) र श्रीलंकालाई विकल्पको रुपमा लिईएको छ ।

नोबेल पुरस्कार विजेता प्राध्यापक मोहम्मद युनुस नेतृत्वको बिहीवार बंगलादेशमा अन्तरिम सरकार बनाईएको छ । त्यो सरकारलाई नयाँ निर्वाचन नभएसम्मका लागि देशको मामिला सञ्चालन गर्नेछ ।

पूर्व प्रधानमन्त्री शेख हसिनाले देश छोडेपछि बिसिबीका अध्यक्ष नजमुल हसनसहित धेरै बोर्ड निर्देशकहरू पनि हसिनाको पार्टी अवामी लिगको समर्थनका कारण बङ्गलादेश छोड्न बाध्य भएका थिए ।

यद्दपि, बोर्डका केही सदस्यहरू भने ढाकामा रहेको बताइए छ । अक्टोबर ३ देखि २० सम्म ढाकाको शेर–ए–बंगला राष्ट्रिय क्रिकेट रङ्गशाला र सिलेटको सिलेट अन्तर्राष्ट्रिय क्रिकेट रङ्गशालामा १० टोलीको सहभागितामा विश्वकप १८ दिन सम्म खेल्ने तालिका छ ।

बिसिबीका अम्पायर कमिटीका अध्यक्ष इफ्तेखार अहमद मिठूले भने, ‘हामी प्रतियोगिता आयोजना गर्ने प्रयासमा छौं । इमान्दारीका साथ भन्ने हो भने हामीबीच देशमा धेरै मानिस उपस्थित छैनन् र बिहीवार हामीले सेना प्रमुखलाई आइसिसी महिला टी–२० विश्वकपको सुरक्षाको आश्वासनबारे पत्र पठाएका छौं ।’

‘आइसिसीले दुई दिनअघि हामीसँग कुराकानी गरेको थियो र हामीले चाँडै नै उनीहरूकहाँ फर्काउने जवाफ दिएका थियौँ। अन्तरिम सरकार गठन भइसकेपछि पनि हामीले उनीहरूलाई सुरक्षाको प्रत्याभूति दिनैपर्छ । सेनाबाट लिखित आश्वासन प्राप्त भएपछि हामी आईसीसीलाई सुचित गर्नेछौं,’ उनले थपे ।

आइसिसीले अगष्ट १० सम्म समय लिएर बंगलादेशको मैदानको अवस्था हेरेर प्रतियोगिता स्थलबारे निर्णय लिने बताइएको छ ।