काठमाडौं (हाम्रो खेलकुद) – मिक्समान्डुले भक्तविर सिंह इन्डोर टि-१० क्रिकेट प्रतियोगिताको उपाधि जितेको छ ।

शनिबार भएको फाइनल खेलमा मिक्समान्डुले मिक्समान्डु लेजेन्ड्सलाई १४ रनले पराजित गर्दै च्याम्पियन बनेको हो ।

मिक्समान्डुले प्रस्तुत गरेको १ सय १२ रनको लक्ष्य पछ्याउने क्रममा लेजेन्ड्सले निर्धारित १० ओभरमा ३ विकेट गुमाएर ९७ मात्र बनाउन सक्यो ।

लेजेन्ड्सका लागि विवेक राना मगरले सर्वाधिक ५३ तथा सुमनले १७ रन बनाए । आदित्य १३ रनमा अविजित रहँदा उत्तम थापा मगरले ५ रन जोडे ।रुपेश श्रीवास्तवले १ विकेट लिए ।

त्यसअघि टस जितेर पहिले ब्याटिङ गरेको मिक्समान्डुले निर्धारित १० ओभरमा ७ विकेट गुमाएर १ सय ११ रन बनाएको थियो । इशान पाण्डेले ३५ तथा रित गौतमले ३२ रन बनाए ।

च्याम्पियन भएसँगै मिक्समान्डुले १ लाख ८० हजार नगद, ट्रफि तथा प्रमाण पत्र प्राप्त गर्यो । उपविजेता लिजेन्ड्सले भने ८० हजार नगद, ट्रफि तथा प्रमाणपत्र प्राप्त गर्यो ।

सर्वोत्कृष्ट ब्याटरमा ब्याकयार्ड ब्रुका सन्देश कार्की चयन भए । कार्कीले ५ हजार नगद प्राप्त गरे । ललित सिंह भण्डारी उत्कृष्ट बलर भए । बलर भण्डारीले नगद ५ हजार प्राप्त गरे । उत्कृष्ट फिल्डर महेश विष्ट भए । उनले नगद २ हजार प्राप्त गरे । प्लेयर अफ द टुर्नामेन्ट विधान श्रेष्ठले प्राप्त गरे ।श्रेष्ठले १० हजार नगद प्राप्त गरे ।

कटिया हाउस प्रालिको आयोजनामा साउन २२ बाट प्रतियोगिता सुरु भएको थियो । प्रतियोगितामा १६ टोलीको सहभागीता रहेको थियो ।