सागर अधिकारी, काठमाडौं

नेपाली पुरुष क्रिकेट टोलीले हालसम्म ६६ एकदिवसीय अन्तर्राष्ट्रिय (ओडिआई) खेलिसकेको छ । सन् २०१८ अगस्ट १ मा ओडिआई डेब्यु गरेको नेपालले यसबीचमा धेरै उपलब्धि हासिल गरेको छ ।

नेपालले ओडीआई फर्म्याटमै धेरै कीर्तिमान पनि कायम गरेको छ । नेपालले ६६ मध्य ३४ खेलमा जित हात पारेको छ । ३४ खेलमा फरक फरक खेलाडीहरु चम्किएका छन् । ३४ खेल जित्दा ३३ पटक नेपाली खेलाडीले प्लेयर अफ द म्याच अवार्ड पाएका छन् ।

नेपालबाट ३३ प्लेयर अफ द म्याच अवार्ड १३ फरक खेलाडीले जितेका छन् । युएईसँगको १६ मार्च २०२३ मा नेपालले डकवर्थ लुईस पद्दतीमा जितेको खेलमा भने युएईका खेलाडी प्लेयर अफ द म्याच बनेका थिए ।

नेपालबाट ओडिआई क्रिकेटमा पहिलो प्लेयर अफ द म्याच हुने खेलाडी सोमपाल कामी हुन् । सोमपालले २०१८ अगस्ट ३ मा नेदरल्यान्ड्ससँगको खेलमा यो सफलता प्राप्त गरेका थिए । ओडिआईमा नेपालको पहिलो जित भएको खेलमा सोमपालले ४६ बलमा ६१ रन तथा ४१ रन खर्चिएर १ विकेट लिदै यो सफलता पाएका थिए । सो खेल नेपालले १ रनले जितेको थियो ।

नेपालबाट हालसम्म प्लेयर अफ द म्याच बनेका खेलाडीको सुची यसप्रकार रहेको छ ।

१) रोहित कुमार पौडेल र आसिफ शेख – ५ पटक

२) करण केसी, कुशल भुर्तेल, सन्दीप लामिछाने – ४ पटक

३) सोमपाल कामी, गुसन झा र दीपेन्द्रसिंह ऐरी – २ पटक

४) भीम सार्की, पारस खड्का, आरिफ शेख, अनिल कुमार शाह र कुशल मल्ल – १ पटक

नेपालका लागि ५ पटक प्लेयर अफ द म्याच अवार्ड जित्ने सुचीमा २ खेलाडी रहेका छन् ।

१) रोहित कुमार पौडेल

नेपालका वर्तमान कप्तान रोहित कुमार पौडेलले ५ प्लेयर अफ द म्याच अवार्ड जितेका छन् । रोहितले पहिलो प्लेयर अफ द म्याच अवार्ड पपुवा न्युगिनी विरुद्ध १९ सेप्टेम्बर २०२२ मा ८३ बलमा ६० रन बनाउँदै पाएका थिए । स्कटल्यान्डविरुद्ध २१ फेब्रुअरी २०२३ मा १ सय १ बलमा अविजित ९५ रन बनाउँदै उनी दोस्रो पटक प्लेयर अफ द म्याच घोषित भए ।

तेस्रो प्लेयर अफ द म्याच अवार्ड युएईविरुद्ध १२ मार्च २०२३ मा १ सय १२ बलमा ७७ रन बनाउँदै पाएका थिए । त्यसपछि गत वर्ष क्यानडाविरुद्ध सिरिजमा उनले दुई पटक अवार्ड जिते । एक खेलमा २२ रन खर्चिएर ४ विकेट लिँदै चौथो प्लेयर अफ द म्याच तथा क्यानडाविरुद्ध नै १ सय १ बलमा ८७ रन बनाउँदै पाँचौ पटक सो अवार्ड पाए ।

२) आसिफ शेख

नेपाली टिमका ओपनर आसिफ शेखले ५ प्लेयर अफ द म्याच अवार्ड जितेका छन् । सर्वप्रथम आसिफले स्कटल्यान्डविरुद्ध स्कटल्यान्डमा नै भएको खेलमा प्लेयर अफ द म्याच अवार्ड जितेका थिए । ६२ बलमा ७१ रन बनाएपछि उनी अवार्डको हकदार बने । युएईविरुद्ध आसिफले नेपालमै भएको १८ नोभेम्बर २०२२ को खेलमा दोस्रो पटक अवार्ड जिते ।

आसिफले तेस्रो प्लेयर अफ द म्याच अवार्ड नेपालमै नामिबियाविरुद्ध खेलमा ९८ बलमा ८१ रन बनाउँदै हात पारे । पिएनजीविरुद्ध अविजित ८६ रन बनाउँदै १८ फेब्रुअरी २०२३ मा आसिफले चौथो पटक यो अवार्ड जितेका थिए । पाँचौ प्लेयर अफ द म्याच अवार्ड २०२३ मार्च ९ मा पीएनजीविरुद्ध १ सय १० रन को शतकीय इनिङका लागि पाएका थिए ।

नेपालका लागि ४ पटक प्लेयर अफ द म्याच अवार्ड जित्ने सुचीमा ३ खेलाडी रहेका छन् ।

१) कुशल भुर्तेल

कुशलले अमेरिकाविरुद्ध ओमानमा भएको खेलमा पहिलो प्लेयर अफ द म्याच अवार्ड जितेका थिए । त्यस खेलमा कुशलले ८४ रन बनाउनुका साथै ३ क्याच पनि लिएका थिए । नेपालमा भएको नामिबियाविरुद्धको खेलमा कुशलले दोस्रो पटक म्यान अफ द म्याचको अवार्ड जितेका थिए । नामिबियाविरुद्ध कुशलले १ सय १५ रनको शतकीय इनिङ खेलेका थिए ।

पिएनजीजिरुद्ध कुशलले तेस्रो पटक प्लेयर अफ द म्याच अवार्ड जितेका थिए । युएईमा भएको खेलमा कुशलले ५६ रन बनाउँदै यो अवार्ड जितेका थिए । चौथो पटक नेपालमै १७ फेब्रुअरी २०२४ मा भएको नेदरल्यान्ड्सविरुद्धको खेलमा कुशलले प्लेयर अफ द म्याच अवार्ड जिते । नेदरल्यान्ड्सविरुद्ध उनले २८ रन बनाउनुको साथै २० रन खर्चिएर ४ विकेट लिएका थिए ।

२) सन्दीप लामिछाने

नेपालमै १२ फेब्रुअरी २०२० मा भएको खेलमा अमेरिकाविरुद्ध सन्दीपले पहिलो प्लेयर अफ द म्याच अवार्ड पाएका थिए । सन्दीपले अमेरिकाविरुद्ध १६ रन खर्चिएर ६ विकेट लिएका थिए । ओमानमा ७ सेप्टेम्बर २०२१ मा पिएनजीविरुद्ध सन्दीपले दोस्रो पटक प्लेयर अफ द म्याच अवार्ड जिते । पिएनजीविरुद्ध सन्दीपले ३५ रन खर्चिएर ४ विकेट लिएका थिए ।

सन्दीपले १० सेप्टेम्बर २०२१ मा ओमानमा नै पिएनजीविरुद्धको ११ रन खर्चिएर ६ विकेट हात पारेपछि प्लेयर अफ द म्याच अवार्ड जिते । चौथो प्लेयर अफ द म्याच अवार्ड सन्दीपले नेपालमै भएको पीएनजीविरुद्धको खेलमा पाएका थिए । पिएनजीसँगको सो खेलमा उनले २५ रन खर्चिएर ५ विकेट लिएका थिए ।

३) करण केसी

करणले नेपालमै भएको अमेरिकासँगको खेलमा प्लेयर अफ द म्याचको पहिलो अवार्ड जितेका थिए । फेब्रुअरी ८ २०२० मा भएको खेलमा करणले ४ विकेट लिनुका साथै १२ रन समेत बनाएका थिए । ओमानमा भएको घरेलु टोलीसँगको खेलमा नै करणले दोस्रो पटक यो अवार्ड जिते । १९ सेप्टेम्बर २०२१ मा भएको खेलमा करणले २५ रन खर्चिदै ४ विकेट लिएका थिए ।

तेस्रो पटक १४ जुन २०२२ मा अमेरिकामा भएको ओमानविरुद्धको खेलमा करणले प्लेयर अफ द म्याच चुनिए । उक्त खेलमा उनले ३३ रन खर्चिएर ५ विकेट लिएका थिए । २० जुन २०२३ मा जिम्बावेमा अमेरिकाविरुद्धको खेलमा करणले चौथो पटक यो अवार्ड प्राप्त गरे । त्यस खेलमा करणले ३३ रन खर्चिएर ४ विकेट लिएका थिए ।

नेपालका लागि २ पटक प्लेयर अफ द म्याच अवार्ड जित्ने सुचीमा ३ खेलाडी रहेका छन् ।

१) सोमपाल कामी

आफ्नो करियरमा मात्र नभई नेपालको ओडिआई ईतिहासमा नै पहिलो प्लेयर अफ द म्याच सोमपाल नेदरल्यान्ड्सविरुद्धको खेलमा भएका थिए । ३ अगस्ट २०१८ मा भएको खेलमा सोमपालले ४६ बलमा ६१ रन बनाउनुको साथै ४१ रन खर्चिएर १ विकेट समेत लिएका थिए ।

दोस्रो प्लेयर अफ द म्याच सोमपालले युएईविरुद्धको खेलमा जितेका थिए । युएईमा २६ जनवरी २०१९ मा भएको खेलमा उनले ३३ रन खर्चिएर ५ विकेट लिएका थिए ।

२) गुलसन झा

युएईविरुद्ध १६ नोभेम्बर २०२२ मा नेपालमै भएको खेलमा झाले पहिलो प्लेयर अफ द म्याचको अवार्ड जितेका थिए । उक्त खेलमा झाले ३७ रन बनाउनुको साथै १ विकेट लिएका थिए ।

युएईविरुद्ध १ मे २०२३ मा भएको खेलमा गुलसनले दोस्रो प्लेयर अफ द म्याच अर्वाड जितेका थिए । सो खेलमा गुलसनले अविजित ६७ रन बनाउनुको साथै १ विकेट पनि लिएका थिए ।

३) दीपेन्द्रसिंह ऐरी

नेपालमै १७ फेब्रुअरी २०२३ मा स्कटल्यान्डविरुद्ध दीपेन्द्र पहिलो पटक अवार्ड जितेका थिए । उक्त खेलमा दीपेन्द्रले अविजित ८५ रन बनाएका थिए ।

जिम्बावेमा २ जुलाई २०२३ मा युएईविरुद्ध दीपेन्द्रले दोस्रो प्लेयर अफ द म्याच जितेका थिए । युएईविरुद्धको खेलमा दीपेन्द्रले अविजित ७९ रन तथा १ विकेट लिएका थिए ।

नेपालका लागि १ पटक प्लेयर अफ द म्याच अवार्ड जित्ने सुचीमा ५ खेलाडी रहेका छन् ।

१) पारस खड्का

नेपालको ओडिआई ईतिहासको पहिलो शतक बनाउदै युएईविरुद्ध पारसले पहिलो प्लेयर अफ द म्याच जितेका थिए । युएईमा २८ जनवरी २०१९ मा भएको खेलमा पारसले १ सय ९ बलमा १ सय १५ रन बनाउनुको साथै २ विकेट पनि लिएका थिए ।

२) आरिफ शेख

युएईमा २२ मार्च २०२२ मा भएको पीएनजीविरुद्धको खेलमा आरिफले पहिलो पटक प्लेयर अफ द म्याच जितेका थिए । उक्त खेलमा आरिफले १०२ बलमा अविजित ५९ रन बनाएका थिए ।

३) भीम सार्की

युएईमा घरेलु टोलीविरुद्ध ६ मार्च २०२३ मा भीमले पहिलो पटक प्लेयर अफ द म्याच अवार्ड पाएका थिए । उक्त खेलमा भीमले ९९ बलमा ७० रन बनाएका थिए ।

४) अनिलकुमार शाह

नेपालमा नै भएको क्यानडाविरुद्धको खेलमा शाहले पहिलो पटक प्लेयर अफ द म्याच अवार्ड जितेका थिए । अनिलले उक्त खेलमा १ सय २४ बलमा अविजित १ सय १२ रन बनाएका थिए ।

५) कुशल मल्ल

नेपालमा नै २१ अप्रिल २०२३ मा भएको ओमानविरुद्धको खेलमा कुशल पहिलो पटक प्लेयर अफ द म्याच भएका थिए । ओमानविरुद्धको उक्त खेलमा कुशलले ६४ बलमा १ सय ८ रन बनाएका थिए ।