चितवन (हाम्रो खेलकुद) – चितवन जिल्ला क्रिकेट संघ (सिएसी ) को आयोजनामा प्रथम सिएमसी ‘इण्डोर कर्पोरेट कप’ लिग क्रिकेट प्रतियोगिता यसै साता सुरु हुने भएको छ ।

चितवन मेडिकल कलेज (सिएमसी) को मुख्य प्रायोजनामा भदौ १४ गते सुरु हुने प्रतियोगिताको तयारी पूरा भएको बुधवार पत्रकार सम्मेलनमा सिएसीका अध्यक्ष सुदिप पियाले जानकारी दिए।

पियाका अनुसार प्रतियोगितामा चितवन र नवलपुरका १६ वटा कर्पोरेट टोलीले भाग लिनेछन्। संघ र यहाँका कर्पोरेट संस्थाहरुसंग सम्बन्ध मजबुत बनाउनुका साथै चितवनको टोलीलाई‌ भारतको‌ मुम्बईमा सहभागी गराउने उद्देश्यका प्रतियोगिता आयोजना गर्न लागिएको पियाले बताए ।

सिएमसी प्रमुख कार्यकारी अधिकृत (सिइओ) प्रताप देवकोटाले स्वास्थ्यका लागि खेलकुद भन्ने नारालाई सार्थकता तुल्याउन क्रिकेटमा सहयोग गरिएको बताए ।

उनले विगतमा पनि अस्पतालले सामाजिक उत्तरदायित्व अन्तरगत विभिन्न खेलकुदका कार्यक्रममा सहभागिता जनाएको भन्दै यसलाई निरन्तरता दिने स्वरुप यो प्रतियोगितामा सहकार्य गरिएको बताए ।

सिएमसीले यसअघि चितवनमा पहिलोपटक नारायणी इभेन्ट्सको सहकार्यमा चितवन प्रिमियर लिग (सिपिएल) क्रिकेट प्रतियोगिता आयोजना गरेको थियो ।

सिएसीका सल्लाहकार एवं सेन्ट्रल कलेज अफ भोकेशनल ट्रेनिङका प्रिन्सिपल वाइबी पौडेलले खेलकुद क्षेत्रमा मेडिकल क्षेत्रबाट पनि सहकार्य हुनु राम्रो पक्ष भएको बताए ।

पत्रकार सम्मेलनमा प्रतियोगिताका विजेता र उपविजेताले पाउने ट्रफी सार्वजनिक गरिएको थियो । प्रतियोगिताको विजेताले ५० र दोस्रो हुने टोलीले २५ हजार प्राप्त गर्नेछ ।

सोही अवसरमा यस्तै प्रतियोगिता आयोजनाका लागि सिएमसी र सिएसीबीच सम्झौता पत्रमा हस्ताक्षर गरिएको थियो । प्रतियोगिता भरतपुर–३, स्थित क्यासी स्पोर्टस् एण्ड रिक्रियशनल सेन्टरमा हुनछ।