एजेन्सी – जो रुटको कीर्तिमानी शतकको सहयोगमा इङ्ग्ल्यान्ड भ्रमणमा रहेको श्रीलंकाले दोस्रो टेस्ट जितका लागि घरेलु टोलीबाट विशाल लक्ष्य पाएको छ ।

घरेलु टोलीले पहिलो इनिङमा २ सय ३१ रनको अग्रता बनाएको थियो । दोस्रो ईनिङमा घरेलु टोलीले २ सय ५१ रन थप्दै पाहुना टोलीका लागि ४ सय ८३ रनको विशाल लक्ष्य दिएको हो ।

घरेलु टोलीका लागि रुटले १ सय २१ बलमा १ सय ३ रनको शतकीय पारी खेले । रुटको टेस्ट क्रिकेटमा यो ३४औं शतक हो । रुट इङ्ग्ल्यान्डका लागि टेस्ट क्रिकेटमा सर्वाधिक शतक बनाउने सुचीको शीर्ष स्थानमा उक्लिएका छन् । यसअघि एलेस्टर कुकले ३३ शतक बनाउँदै यो कीर्तिमानलाई कायम गरेका थिए । कुकले १ सय ६१ खेलमा ३३ शतक बनाएका थिए ।

रुटले १ सय ४५ खेलमा ३४ शतक बनाउँदै कुकको कीर्तिमानलाई तोडेका हुन् । रुटले पहिलो ईनिङमा समेत शतक बनाएका थिए । रुटले पहिलो पटक दुवै ईनिङमा शतक बनाएका हुन् । टेस्टमा सर्वाधिक शतक बनाउने खेलाडीको शीर्ष स्थानमा भने भारतका सचिन तेन्दुल्कर छन् । सचिनले २ सय खेलमा ५१ शतक बनाएका छन् ।

ह्यारी ब्रुकले ३७, जेमी स्मिथले ३७, बेन डुकेटले ३४ तथा गस एटकिन्सनले १४ रन बनाए । पाहुना टोलीका लागि अशिथा फर्नान्डो र लाहिरु कुमाराले समान ३ तथा प्रबात जयसुर्या र मिलन रत्नायकेले समान २ विकेट लिए ।

शनिबार नै विशाल लक्ष्य पछ्याउन सुरु गरेको पाहुना टोलीले तेस्रो दिनको खेल सकिँदा २ विकेट गुमाएर ५३ रन जोडेको छ । पाहुना टोली लक्ष्यबाट ४ सय ३० रन टाढा रहेको छ ।

पहिलो इनिङमा पाहुना टोलीले १ सय ९६ रन मात्र जोड्यो । टोलीका कमिन्डु मेन्डिसले सर्वाधिक ७४ रन जोडे । दिनेश चन्डिमलले २३, एन्जेलो म्याथ्युजले २२, मिलन रत्नायकेले १९ तथा पथुम निशंकाले १२ रन बनाए ।

घरेलु टोलीका लागि म्याथ्यु पोट, क्रिस वोक्स, गस एटकिन्सन र ओली स्टोनले समान २ तथा शोयव बसिरले १ विकेट आफ्नो नाममा गरे ।

त्यसअघि टस हारेर ब्याटिङको निम्तो पाएको इङ्ल्यान्डले पहिलो इनिङमा ४ सय २७ रनमा बनाएको थियो ।

घरेलु टोलीका लागि गस एटकिन्सन र जोय रुटले शतकीय पारी खेलेका थिए । रुटले २ सय ६ बलमा १ सय ४३ रनको शतकीय पारी खेले ।

एटकिन्सनले १ सय १५ बलमा १ सय १८ रन बनाएका थिए । एटकिन्सनको यो पहिलो टेस्ट शतक रहेको थियो । ओपनर बेन डुकेटले ४०, ह्यारी ब्रुकले ३३, जेमी स्मिथ र म्याथ्यु पोटले समान २१ तथा ड्यान लरेन्सले ९ रन जोडे ।

पाहुना टोलीका लागि पहिलो इनिङमा अशिथा फर्नान्डोले ५, लाहिरु कुमारा र मिलन रत्नायकेले समान २ तथा प्रबात जयसुर्याले १ विकेट लिए । पहिलो टेस्ट घरेलु टोलीले ५ विकेटले जितेको थियो ।