एजेन्सी – बंगलादेशले दोस्रो टेस्टमा पाकिस्तानबाट सामान्य लक्ष्य पाएको छ । दुई खेलको टेस्ट सिरिजका लागि पाकिस्तान भ्रमणमा रहेको बंगलादेशले दोस्रो टेस्ट जित्नका लागि १ सय ८५ रनको लक्ष्य पाएको छ ।

घरेलु टोलीले पहिलो इनिङमा १२ रनको सामान्य अग्रता बनाएको थियो । टोलीले दोस्रो इनिङमा १ सय ७२ रन मात्र थप्न सक्यो ।

उसका लागि आगा सलमानले सर्वाधिक ४७, मोहम्मद रिजवानले ४३, कप्तान शान मक्सुदले २८, सैयब अबयुले २० रन जोडे ।

बंगालादेशका हसन महमुदले १४.३ ओभरमा ४३ रन खर्चिएर ५ विकेट लिए । नहिद रानाले ४ तथा टस्किन अहमदले १ विकेट लिए ।

सोमबार नै लक्ष्य पछ्याउन थालेको बंगलादेशले चौथो दिनको खेल सकिदा कुनै विकेट नगुमाई ४२ रन बनाएको छ । पाहुना टोली ऐतिहासिक रुपमा सिरिज जित्नका अब लागि १ सय ४३ रन टाढा छ ।

लिटन दासको शतकको मद्दतमा पाहुना टोलीले पहिलो इनिङमा मध्यम योगफल तयार गरेको थियो । बंगालादेश पहिलो इनिङमा २ सय ६२ रनमा अल आउट भएको थियो ।

बंगालादेशका दासले २ सय २८ बलमा सर्वाधिक १ सय ३८ रनको शतकीय पारी खेले । बंगलादेश एक समय २६ रन बनाउदा ६ विकेट गुमाएर खराब अबस्थामा पुगेको थियो ।

सातौं विकेटका लागि मेहेदी हसन मिराज र दासले १ सय ६५ रनको महत्वपुर्ण साझेदारी गरेर पाहुना टोलीलाई मध्यम योगफलसम्म पुर्याए ।

मिराजले १ सय २४ बलमा ७८, हसन महमुदले नट आउट १३ तथा शाद्मान इस्लामले १० रन जोडे । अन्य ब्याटरले दोहोरो अंकमा रन बनाउन सकेनन् ।

पाकिस्तानका खुर्रम शाहजादले २१ ओभरमा ९० रन खर्चिएर ६ विकेट लिए । मिर हम्जा र आगा सलमानले समान २ विकेट लिए ।

वर्षाका कारण पहिलो दिन टस समेत नभई खेल रद्द भएको थियो । दोस्रो दिन टस भएको थियो ।