एजेन्सी – आईसिसी विश्वकप लिग टुमा युएईले लगातार चौथो हार बेहोरेको छ । नामिबियामा जारी रहेको लिग टु अन्तर्गतको सिरिजमा युएई अमेरिकासॅंग १० विकेटले पराजित भएको हो ।

युएई घरमा नै भएको लिग टुको पहिलो राउन्डमा क्यानडासॅंग २ र स्कटल्यान्डसॅंग १ खेलमा पराजित भएको थियो । स्कटल्यान्डसॅंगको अर्को खेल भने वर्षाका कारण सम्भव हुन सकेको थिएन ।

नामिबियामा बुधवार भएको खेलमा युएईले दिएको १ सय ६ रनको सामान्य लक्ष्य अमेरिकाले १५.५ ओभरमा कुनै विकेट नगुमाई पूरा गर्यो ।

अमेरिकाको जितमा ओपनर आन्द्रेस गौसले ५४ बलमा १२ चौका र १ छक्काको सहयोगमा नट आउट रहँदै सर्वाधिक ६६ रन बनाए ।

अर्का ओपनर स्मित पटेलले ४१ बलमा ५ चौकाको सहयोगमा ३८ रन जोडे । युएईले ५ बलरको प्रयोग गरे पनि कुनै विकेट भने लिन सकेन ।

त्यसअघि टस हारेर ब्याटिङको निम्ता पाएको युएईले ३१.१ ओभरमा अल आउट हुदै १ सय ६ रन मात्र जोडेको थियो ।

युएईका लागि राहुल चोपराले सर्वाधिक ३२ तथा ओपनर आर्याशं शर्माले ३१ रन जोडे । अलि नासिरले २३ रन बनाउदा अन्य ब्याटरले दोहोरो अंकमा रन जोड्न सकेनन् ।

अमेरिकाका लागि जसदिप सिंहले ४ तथा सौरभ नेत्राभाल्कर, मिलान्ड कुमार र नुस्तुश केन्जिगेले समान २ विकेट लिए ।

जितसॅंगै ८ टोली सहभागी लिगमा अमेरिका ८ अंक सहित तालिकाको चौथो स्थानमा उक्लिएको छ । युएई ४ खेलमा अंक बिहिन रहदै तालिकाको पुछारमा छ ।
नेपाल २ अंकका साथ सातौं स्थानमा छ ।

नेपालको खेल आजै रहेको छ । बेलुका ८ः४५ मा नेपालले ओमानसॅंग खेल्दैछ । सोमवार क्यानडासॅंग नेपाल १ सय ३ रनले पराजित गरेको थियो ।