एजेन्सी – रविचन्द्रन आश्विनको पहिलो इनिङमा शतक तथा दोस्रो इनिङमा ६ विकेट लिएपछि भारतले बंगलादेशलाई २ सय ८० रनले पराजित गरेको छ।

भारतले दुई टेस्टको सिरिजमा १-० को अग्रता लिएको छ । ५ सय १५ रनको लक्ष्य पछ्याएको बंगलादेश दोस्रो इनिङमा चौथो दिन आइतवार २ सय ३४ रनमा अल आउट भयो ।

टोलीका कप्तान नजमल हसन शान्टोले सर्वाधिक ८२, ओपनर शद्मान इस्लामले ३५, अर्का ओपनर जाकिर हसनले ३३ तथा शकिब अल हसनले २५ रन जोडे ।

भारतका आश्विनले २१ ओभरमा ८८ रन खर्चिएर ६ विकेट लिए । रविन्द्र जडेजाले ३ तथा जसप्रित बुमराहले १ विकेट लिए ।

भारतका लागि दोस्रो इनिङमा शुभमन गिल र रिषभ पन्तको शतक सहयोगमा पाहुना टोलीलाई ५ सय १५ रनको विशाल लक्ष्य दिएको थियो ।

दोस्रो इनिङमा घरेलु टोलीले ४ विकेटमा २ सय ८७ रन बनाउदै इनिङ समाप्तीको घोषणा गरेको थियो ।

गिलले नट आउट १ सय १९ रन बनाउदा २१ महिना पछि टेस्ट टिममा पुनरागमन गरेका रिषभले १ सय ९ रन बनाएका थिए। बंगालादेशका मेहेदी हसन मिराजले २ तथा नहिद राना र तस्किन अहमदले समान १ विकेट लिएका थिए ।

पहिलो इनिङमा बंगालादेशले १ सय ४९ रन मात्र बनाउँदा भारतले २ सय २७ रनको अग्रता बनाएको थियो । बंगालादेशका लागि पहिलो इनिङमा शकिब अल हसनले ३२, मेहेदी हसन मिराजले नट आउट २७, लिटन दासले २२ तथा कप्तान नजमल हसन शान्टोले २० रन बनाए ।

भारतका जसप्रित बुमराहले ४, रविन्द्र जडेजा, आकाश दिप र मोहम्मद सिराजले समान २ विकेट लिए ।
त्यसअघि टस हारेर पहिले ब्याटिङको निम्ता पाएको घरेलु टोलीले रविचन्द्रन आश्विनको शतकमा पहिलो इनिङमा ३ सय ७६ रन बनाएको थियो ।

दोस्रो टेस्ट शुक्रवारबाट कानपुरमा सुरु हुनेछ । टेस्ट सिरिज पछि दुई टोलीबीच ३ वटा टि ट्वान्टी आई सिरिज हुनेछ ।