काठमाडौं(हाम्रो खेलकुद) – महिला यु१९ टि ट्वान्टी विश्वकपको एसिया छनोटको तयारीमा रहेको नेपाली टोलीको दोस्रो चरणको २० खेलाडी छनोट भएका छन्। प्रशिक्षणमा‌ रहेका १० खेलाडी दोस्रो चरणमा परेनन् ।

नेपाल क्रिकेट संघ (क्यान) ले बिहीवार दोस्रो चरण छनोट गरेको हो । क्यानले एसिया छनोटका लागि भदौ २६ गते २९ सदस्यीय खेलाडीलाई प्रशिक्षणमा डाकेको थियो ।

पहिलो चरणमा प्रशिक्षण नरहेकी रन्जु श्रेष्ठलाई दोस्रो चरणमा समेटिएको छ । प्रारम्भिक छनोटमा नरहेकी रन्जुलाई दोस्रो चरणमा समेटिएको क्यान प्रवक्ता छुम्बी लामाले जानकारी दिए ।

‘क्यानले छनोटको आधार मानेको प्रतियोगितामा सहभागिता नजनाएका कारण उनलाई पहिलो चरणको सुचिमा राखिएको थिएन,’ प्रवक्ता लामाले हाम्रो खेलकुदसँग भने ‘क्याम्पका दौरान उनलाई बोलाएर प्रदर्शन राम्रो रहेपछि उनलाई दोस्रो चरणमा समावेश गरेको हो ।’

क्यान युवा महिला टोलीको प्रशिक्षकको जिम्मेवारी महेश प्रसाद रिजाललाई दिएको छ । टोलीको बन्द प्रशिक्षण दाङको लमही क्रिकेट मैदानमा भइरहेको छ । विश्वकप एसिया छनोट प्रतियोगिता राउन्ड रोविन लिगका आधारमा हुनेछ ।

खेलतालिका अनुसार नेपालको पहिलो खेल कात्तिक २१ गते थाईल्यान्डसॅंग र दोस्रो खेलमा कात्तिक २२ गते कुवेतसॅंग छ । कात्तिक २४ गते घरेलु टोलीसॅंग खेल्ने नेपालको चौथो खेलमा कात्तिक २५ गते थाइल्यान्डसॅंग हुनेछ ।

पाँचौं खेलमा कात्तिक २७ गते कुवेतसॅंग खेल्ने नेपालको‌ अन्तिम खेलमा कार्तिक २८ मा युएईसॅंग रहेको छ । ४ टोली सहभागी रहने छनोटको शीर्ष टोली विश्वकपका लागि छनोट हुनेछ । विश्वकप अर्को वर्ष मलेसियामा आयोजना हुँदैछ ।

दोस्रो चरणमा छनोट खेलाडी

सोनी पाख्रिन, मनिशा उपाध्याय, कृष्मा गुरुङ, साना प्रविन, प्रतिमा शाह, स्नेहा महरा, साबित्रा धामी, सुस्मिता भुषाल, रन्जु श्रेष्ठ, किरन कुमारी कुँवर, तृषना विक, रिया शर्मा, अलिशा कुमारी यादव, भवानी कामती, पूजा महतो, कुसुम गोदार, सिमाना केसी, ज्योत्सिका मरासिनी, रचना चौधरी, आश्मा पुलामी मगर