एजेन्सी – साविक विजेता अस्ट्रेलिया अपराजित रहँदै युएईमा जारी महिला टि ट्वान्टी विश्वकपको सेमिफाइनलमा पुगेको छ ।

आइतवार समूह चरणको अन्तिम खेलमा अस्ट्रेलियाले भारतमाथि ९ रनको जित हासिल गर्दै अपराजित यात्रा जारी राखेको हो । १ सय ५२ रनको लक्ष्य पछ्याएको भारतले निर्धारित २० ओभरमा ९ विकेट गुमाएर १ सय ४२ रन मात्र बनायो ।

भारतका लागि कप्तान हरमनप्रित कौरले ४७ बलमा ६ चौकाको सहयोगमा ५४ रनको अर्धशतकीय ईनिङ खेलिन् । दिप्ती शर्माले २९, शेफाली बर्माले २० तथा जेमिमा रोड्रिगेजले १६ रन जोडिन् । अस्ट्रेलियाका लागि अनाबेल सुदरल्यान्ड र सोफी मोलिनेक्सले समान २ विकेट लिए ।

त्यसअघि सारजहामा टस हारेर पहिले ब्याटिङको निम्तो पाएको अस्ट्रेलियाले २० ओभरमा ८ विकेट गुमाएर १ सय ५१ रन जोड्यो । अस्ट्रेलियाका लागि ओपनर ग्रेक ह्यारिसले ४० तथा कप्तान तहिल म्याग्रेथ र एलिसा पेरीले समान ३२ रन जोडे ।

भारतका लागि रेनुका सिंह र दिप्ती शर्माले समान २ तथा शृयका पाटिल, पुजा वस्त्राकर र राधा यादवले समान १ विकेट लिए ।

समूह चरणको ४ खेलमा अपराजित रहदै साविक विजेता सेमिफइनलमा स्थान बनाउने पहिलो टोली बनेको छ । भारतले भने समान खेलमा ४ अंक जोडेर सेमिफाइनल सम्भावना कायमै राखेको छ । सोमवार हुने पाकिस्तान र न्युजिल्यान्डको खेल पछि यो समूहबाट सेमिफाइनल पुग्ने अर्को टोलीको निश्चित हुन्छ ।

आजको खेलमा सेमिफाइनलमा स्थान बनाउन न्युजिल्यान्ड र पाकिस्तानलाई विजयी हुनै पर्छ । न्युजिल्यान्डलाई पाकिस्तानमाथिको सामान्य जित पर्याप्त हुनेछ ।

पाकिस्तानलाई भने न्युजिल्यान्डमाथि फराकिलो जित आवश्यक पर्नेछ । पाकिस्तानले न्युजिल्यान्डमाथि सामान्य जित निकालेमा भारत सेमिफाइनल प्रवेश गर्नेछ ।