एजेन्सी – न्युजिल्यान्ड युएईमा जारी महिला टि ट्वान्टी विश्वकपको सेमिफाइनल प्रवेश गरेको छ । समूह ए को आफ्नो अन्तिम खेलमा पाकिस्तानलाई ५४ रनले पराजित गर्दै न्युजिल्यान्डले सेमिफाइनलमा स्थान बनाएको हो ।

सोमवार दुबईमा भएको खेलमा १ सय ११ रनको लक्ष्य पछ्याएको पाकिस्तान ११.४ ओभरमा ५६ रन बनाउँदै अल आउट भयो ।

पाकिस्तानका लागि कप्तान फतिमा सानाले २३ बलमा सर्वाधिक २१ तथा ओपनर मुनिबा अलिले ११ बलमा १५ रन बनाईन् । पाकिस्तानका अन्य ब्याटरले दोहोरो अंकमा रन बनाउन सकेनन् ।

न्युजिल्यान्डका लागि अमिला केरले ३ तथा इडन कारसनले २ विकेट लिईन् ।

त्यसअघि टस जितेर पहिले ब्याटिङ गरेको न्युजिल्यान्डले २० ओभरमा ६ विकेट गुमाएर १ सय १० रन बनाएको थियो । न्युजिल्यान्डका लागि सुजिइ बेटसले २९ बलमा सर्वाधिक २८ तथा ब्रुक हलिडेले २४ बलमा २२ रन जोडिन् ।

पाकिस्तानका लागि नर्शरा सन्धुले ३ तथा सदिया इकवाल, निशा दर र ओमिमा सोहिलले समान १ विकेट लिइन् ।

न्युजिल्यान्ड ४ खेलमा ३ जितका साथ समूह ए को उपविजेता बन्दै सेमिफाइनल प्रवेश गरेको छ । यसअघि नै शतप्रतिशत जित निकाल्दै अस्ट्रेलिया समूह विजेता बन्दै सेमिफाइनल प्रवेश गरिसकेको छ ।

समूह ए बाट भारत, पाकिस्तान र श्रीलंका बाहिरिएका छन् । समूह बी को विजेता र उपविजेता भने मंगलवार हुने वेस्ट इन्डिज र इङ्ग्ल्यान्डबीचको खेल पछि तय हुनेछ ।