एजेन्सी – रचिन रविन्द्रको शतक सहयोगमा पाहुना टोली न्युजिल्यान्डले भारतविरुद्ध पहिलो टेस्टको पहिलो इनिङमा फराकिलो अग्रता कायम गरेको छ ।

३ टेस्ट सिरिजका लागि भारत भ्रमणमा रहेको न्युजिल्यान्डले पहिलो इनिङमा ३ सय ५६ रनको अग्रता लिएको हो ।

वर्षाका कारण पहिलो दिनको खेल पूर्ण रुपले प्रभावित भएकोले दोस्रो दिन बिहीवार मात्र टस सम्भव भएको थियो । भारतको बेंगलुरुमा टस जितेर ब्याटिङ सुरुवात गरेको घरेलु टोली पहिलो इनिङमा ४६ रनमा समेटियो ।

बिहीवार नै पहिलो इनिङको सुरुवात गरेको पाहुना टोलीलेका रचिन रविन्द्र १ सय ३४ रनको शतकीय इनिङ खेल्दा ओपनर डेभन कन्वेले सर्वाधिक ९१, टिम साउथीले ६५, विल योंगले २९ तथा कप्तान टम लाथमले १५ रन जोडेका थिए ।

घरेलु टोलीका लागि रविन्द्र जडेजा र कुलदिप यादवले समान ३, मोहम्मद सिराजले २ तथा जसप्रित बुमराह र रविचन्द्रन आश्विनले समान १ विकेट लिए । आजै दोस्रो इनिङको सुरुवात गरेको घरेलु टोलीले तेस्रो दिनको खेल सकिदा ३ विकेट गुमाएर २ सय ३१ रन बनाएको छ ।

घरेलु टोलीका सरफराज खान ७० रन बनाएर क्रिजमा छन् । त्यसअघि विराट कोहली ७० तथा कप्तान रोहित शर्मा ५२ रन बनाउदै आउट भएका थिए । तेस्रो दिनको खेल सकिदा घरेलु टोली दोस्रो इनिङमा १ सय २५ रनले पछि रहेको छ ।

भारतका लागि २ ब्याटर बाहेक अन्यले दोहोरो अंक रन जोड्न नसक्दा ४ खेलाडीले रनको खाता नै खोल्न सकेनन् ।

भारतको टेस्ट इतिहासमा कुनै पनि इनिङमा बनेको यो तेस्रो कम योगफल हो । पहिलो इनिङमा भारतले बनाएको यो सबैभन्दा कमको योगफल हो ।

घरेलु टोलीका लागि विकेट किपर ब्याटर रिषभ पन्तले सर्वाधिक २० तथा ओपनर यशस्वी जैसवालले १३ रन जोडे । मोहम्मद सिराज ४ रनमा नट आउट रहे । भ्रमणकारी टोलीका लागि म्याट हेनरी १३।२ ओभरमा १५ रन खर्चिएर ५ विकेट लिए । विलियम ओरोर्कले ४ तथा टिम साउथीले १ विकेट लिए ।