काठमाडौं (हाम्रो खेलकुद ) – स्कटल्यान्डका अलराउन्डर ब्रान्डन मक्मलेनले सुदूरपश्चिम रोयल्सबाट नेपाल सुपर लिग (एनपिएल) खेल्ने भएका छन् ।

सुदूरपश्चिम रोयल्सले एनपिएलका लागि मक्मलेनलाई अनुबन्ध गरेको सोमबार प्रेस विज्ञप्ति मार्फत जानकारी गराएको छ । टोलीले अनुबन्ध गरेको मक्मलेन पहिलो विदेशी खेलाडी हुन् । उनको आगमनले एनपिएलमा टोलीको प्रर्दशन उत्कृष्ट रहनेमा आशावादी रहेको सुदूरपश्चिमले जनाएको छ।

२५ वर्षे दायाँ हाते ब्याटर उनले स्कटल्यान्डबाट  १६ टि ट्वान्टी आईमा ६ अर्धशतकसहित ४ सय ९७ रन बनाएका छन् । उनले सन् २०२३ मा जर्मनीविरुद्ध खेल्दै टि ट्वान्टी आईमा डेब्यु गरेका थिए ।

उनी स्कटल्याण्डको ओडिआई टोलीको पनि सदस्य हुन् । २२ ओडिआईमा उनले २ शतक र २ अर्धशतकसहित ७ सय २१ रन बनाएका छन्।

सुदूरपश्चिम रोयल्सले यसअघि अस्ट्रेलियाका विश्वकप  विजेता पूर्व क्रिकेटर ब्राड हजलाई आफ्नो प्रमुख मेन्टर नियुक्त गरिसकेको छ।

टोलीको‌ मार्की खेलाडीमा दीपेन्द्र सिंह ऐरी र मुख्य प्रशिक्षकमा जगत टमाटा छन्।नेपाल क्रिकेट संघ (क्यान) को आयोजनामा ८ टोलीको सहभागितामा मंसिर १६ गते देखि एनपिएल सुरु हुनेछ।

सुदूरपश्चिम रोयल्सको टोली – दीपेन्द्र सिंह ऐरी, आरिफ शेख, अभिनास बोहोरा, विनोद भण्डारी , अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद , अमित श्रेष्ठ र ब्रान्डन मक्मलेन ।