काठमाडौं(हाम्रो खेलकुद) – अमेरिका ‘ए’ सँगको ५० ओभरको अभ्यास खेलमा नेपाल टोली पराजित भएको छ ।

अमेरिकाको डालसस्थिती ग्राण्ड प्रेरीमा बुधवार बिहान भएको खेलमा नेपाल अमेरिका ‘ए’ सँग ४ विकेटले पराजित भयो । ८१ रनको सामान्य लक्ष्य अमेरिका ‘ए’ ले २३.१ ओभरमा ६ विकेट गुमाएर पूरा गर्यो ।

टस हारेर ब्याटिङको निम्ता पाएको नेपाल २५.३ओभरमा ८० रनमा अल आउट भएको थियो । कुशल मल्लले ४८ बलमा १८, देव खनालले १२ तथा भीम सार्कीले १० रन जोड्दा अन्य ब्याटरले दोहोरो अंकमा रन बनाउन सकेनन् ।

सामान्य लक्ष्य पछ्याएको अमेरिका ‘ए’ का नितिश रेड्डीले ३९ बलमा सर्वाधिक २९ तथा ओपनर राहुल जरिवालले ३३ बलमा २६ रन जोडे ।

नेपालका लागि सन्दीप लामिछानेले ४ तथा रिजन ढकाल र ललितनारायण राजवंशीले समान १ विकेट लिए ।

त्यसअघि अमेरिकासँग ३ खेलको टी ट्वान्टी सिरिज नेपालले क्लिन स्विप गरेको थियो । अमेरिकामा कात्तिक ९ बाट १९ गतेसम्म विश्व कप लिग टु अन्तर्गतको त्रिकोणात्मक ओडिआई सिरिज आयोजना हुँदैछ । सिरिजमा घरेलु टोली सहित नेपाल र स्कटल्यान्ड खेल्दै छन् ।

सिरिजमा नेपालको पहिलो खेल कात्तिक ११ गते अमेरिकासँग तथा दोस्रो खेल कात्तिक १३ गते स्कटल्यान्डसँग हुनेछ । नेपालले तेस्रो खेल कात्तिक १७ गते अमेरिकासँग र चौथो तथा अन्तिम खेल कात्तिक १९ गते स्कटल्यान्डसँग खेल्नेछ ।

सिरिजको सबै खेल टेक्ससको डालसस्थित ग्रान्ड प्रेरि स्टेडियममा हुनेछ। सबै खेल नेपाली समयअनुसार राति ९ः१५ बजे सुरु हुनेछ।

अमेरिका ‘ए’ विरुद्ध नेपाली टोली

अनिलकुमार शाह, भीम सार्की, रोहितकुमार पौडेल(कप्तान), कुशल भुर्तेल, कुशल मल्ल, दीपेन्द्रसिंह ऐरी, अर्जुन साउद, आरिफ शेख, करण केसी, रिजन ढकाल र सन्दीप लामिछाने।