एजेन्सी – जिम्बाब्वे क्रिकेट टोलीका कप्तान सिकन्दर राजाले भारतीय पुर्व कप्तान विराट कोहलीलाई पछि पारेका छन् ।

टि ट्वान्टी आईमा सर्वाधिक प्लेयर अफ द म्याच जित्ने कोहीलको कीर्तिमान राजाले तोडेका हुन् । यही वर्षको २९ जुनमा टि ट्वान्टी विश्वकपको फाइनलमा दक्षिण अफ्रिकालाई हराए पश्चात टि ट्वान्टी आईबाट सन्यास लिएका कोहलीले उक्त खेलमा सहित १६ प्लेयर अफ द म्याच जितेका थिए ।

राजाले आइसिसी पुरुष टि ट्वान्टी विश्वकप अफ्रिका उप-क्षेत्रिय छनोटमा गाम्बियाविरुद्धको खेलमा प्लेयर अफ द म्याच पाउदै कोहलीको यो कीर्तिमान तोडेका हुन् । यो राजाको १७औं प्लेयर अफ द म्याच अवार्ड रहेको थियो ।

मलेसियाका विरनदिप सिंह र भारतका कप्तान सुर्यकुमार यादवले समान १६ पटक अवार्ड जित्दै राजालाई पछ्याइरहेका छन् ।

गाम्बियाविरुद्धको खेलमा जिम्बाब्वेले ३ सय ४४ रनको योगफल तयार गर्दै नेपालले एकै इनिङमा बनाएको सर्वाधिक योगफलको कीर्तिमान तोडेको थियो । नेपालले यसअघि टि ट्वान्टी आईमा एकै इनिङमा ३ सय १४ रन बनाउदै सर्वाधिक योगफलको कीर्तिमान बनाएको थियो ।

सन् २०२३ सेप्टेम्बर २७ मा नेपालले एसियाली खेलकुद मा मंगोलियाविरुद्ध कीर्तिमान बनाएको थियो । बुधवार जिम्बाब्वेले गाम्बियाविरुद्ध निर्धारित २० ओभरमा ४ विकेट गुमाएर ३ सय ४४ रन बनाएको थियो ।

यस खेलमा नै जिम्बाब्वेले टि ट्वान्टी आईमा पहिलो शतक पाएको थियो । जिम्बाब्वेका कप्तान राजाले ४३ बलमा ७ चौका र १५ छक्काको सहयोगमा नट आउट १ सय ३३ रनको शतकीय इनिङ खेलेका थिए । उक्त खेलमा जिम्बाब्वेका ३ खेलाडीले अर्धशतक प्रहार भएका थिए ।