काठमाडौं (हाम्रो खेलकुद) – युवा तीव्र गतिका बलर विपिन महतोको ७ विकेटका बाबजुद कोशी प्रदेश नरेश स्मृती यू-१९ राष्ट्रिय क्रिकेट प्रतियोगितामा मधेश प्रदेशसँग २२ रनले पराजित भएको छ ।

शनिवारबाट विराटनगरमा सुरु प्रतियोगिता पहिलो खेलमा १ सय ८६ रनको लक्ष्य पछ्याएको कोशीले ४३ ओभरमा १ सय ६३ रन अल आउट भयो ।

कोशीका सोनु अन्सारीले ४८ बलमा ३ चौका र २ छक्कासहित सर्वाधिक ३९, आशिष मगरले ४१ बलमा ३१, विपिन महतोले ८ बलमा १४ र रविन मण्डलले १० रन बनाए । मधेशका रन्जित कुमार र अरफुदिन रेनले ३-३ तथा राजेश यादव, अभिषेक तिवारी र रोहन शाहको नाममा १-१ विकेट रह्यो ।

त्यसअघि ग्रिजाप्रसाद कोइराला क्रिकेट मैदानमा टस जितेर मधेशले ब्याटिङ रोजेकोमा ४६.२ ओभरमा १ सय ८५ रनमा अल आउट भयो ।

मधेशका ओपनर तथा नेपाल ए बाट खेली सकेका मयन यादवले ६६ बलमा ४ चौका र ३ छक्कासहित सर्वाधिक ५२ रन बनाए । शहिल यादवले ४६ बलमा २ चौका र ३ छक्कासहित ४८, कप्तान अभिषेक तिवारीले २३ तथा निरज कुमार यादवले २१ रन जोडे ।

कोशीका विपिन महतोले ९.२ ओभरमा ४२ रन खर्चिदै ७ विकेट लिदै हारका बाबजुद प्लेयर अफ द म्याच चुनिए । कार्तिक २१ सम्म चल्ने प्रतियोगितामा ७ प्रदेशको सहभागीता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।