काठमाडौं (हाम्रो खेलकुद) – स्पिन बलर अपराजित पौडेलको ५ विकेट सहयोगमा गण्डकी प्रदेशले विराटनगरमा जारी नरेश श्रेष्ठ मेमोरियल यु १९ राष्ट्रिय क्रिकेट प्रतियोगितामा विजयी सुरुवात गरेको छ ।

सोमवार प्रतियोगिताको आफ्नो पहिलो खेलमा गण्डकीले मधेश प्रदेशमाथि ९ विकेटको फराकिलो जित निकाल्यो ।

मधेशले दिएको ८३ रनको सामान्य लक्ष्य गण्डकीले १८.२ ओभरमा १ विकेट गुमाएर पूरा गर्यो । गण्डकीको जितमा सोहिल कुवँरले ५१ बलमा ५ चौका र १ छक्काको सहयोगमा नट आउट ३४ रन बनाए । ओपनर अर्जुन कुमालले ४५ बलमा २४ तथा करन पगेंनीले १४ बलमा नट आउट ९ रन जोडे । मधेशका लागि जितेश मण्डलको नाममा १ विकेट रह्यो ।

त्यसअघि म्यारिवोन विराटनगर क्रिकेट मैदानमा टस जितेर पहिले ब्याटिङ गरेको मधेशले ३५.३ ओभरमा ८२ रन बनाउँदै अल आउट भयो । मधेशका लागि जितेश मण्डलले ५० बलमा ३२, निरज कुमार यादवले ३९ बलमा १८ तथा मयन यादवले १३ रन जोडेका थिए । गण्डकीका लागि अपराजितले १० ओभरमा १७ रन खर्चिएर ५ विकेट लिन सफल भए । अश्विन थापाले २ तथा किरन भट्टराई र क्याब्रिन श्रेष्ठले समान १ विकेट लिए ।

पहिलो खेलमा जित हात पारेको गण्डकीको २ अंक भएको छ । दोस्रो खेलमा पहिलो हार बेहारेको मधेशको पनि समान अंक रहेको छ । कार्तिक २१ सम्म चल्ने प्रतियोगितामा ७ प्रदेशको सहभागीता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।