काठमाडौं(हाम्रो खेलकुद) – यसै साता सुरु हुने १९औं संस्करण द हङकङ क्रिकेट सिक्सेसमा सहभागी हुने नेपाली टोली मंगलवार त्यसतर्फ प्रस्थान गरेको छ ।

नेपाल क्रिकेट संघ(क्यान) ले हङकङ सिक्सेसमा सहभागी हुने नेपाली टोलीको मंगलवार बिदाइ गरेको हो ।

कात्तिक १६ बाट १८ गतेसम्म हुने प्रतियोगिताको समूह ‘बी’ मा नेपालसहित अस्ट्रेलिया र इङ्ग्ल्याण्ड छन् । नेपालले आफ्नो पहिलो खेलमा कात्तिक १६ गते इङ्ग्ल्याण्डसँग खेल्नेछ । नेपालले अस्ट्रेलियासँग कात्तिक १७ गते खेल्नेछ ।

प्रतियोगितामा १२ राष्ट्रको सहभागिता रहेको छ । सहभागी राष्ट्रलाई ४ समूहमा विभाजन गरिएको छ । हरेक समूहका शीर्ष २ टोली क्वाटरफाइनलका लागि छनोट हुनेछन् । प्रतियोगिताको सेमिफाइनल र फाइनल खेल कात्तिक १८ गते हुनेछ ।

समूह ‘ए’ मा साविक विजेता दक्षिण अफ्रिका, न्युजिल्यान्ड र हङकङ तथा समूह ‘सी’ मा भारत, पाकिस्तान र युएई छन्। श्रीलंका, बंगलादेश र ओमान समूह ‘डी’ छन् ।

सन् २०१७ मा भएको प्रतियोगिताको पछिल्लो संस्करणमा पाकिस्तानलाई पराजित गर्दै दक्षिण अफ्रिका विजेता बनेको थियो । प्रतियोगिताका खेलहरुमा हरेक टोलीबाट ६ खेलाडी सहभागी हुनेछन् ।

नेपाली टोली

सन्दीप जोरा(कप्तान), राशिद खान, नारायण जोशी, लोकेश बम, दीपेन्द्र रावत, विवेक यादव र प्रतिस जिशी

मुख्य प्रशिक्षक : ज्ञानेन्द्र मल्ल