डालस, (हाम्रो खेलकुद) – स्पिनर सन्दीप लामिछानेले आईसीसी विश्वकप लिग २ त्रिकोणात्मक सिरिजमा स्कटल्यान्डका प्रमुख ब्याटर ब्रेन्डन म्याकमुलेनलाई आउट गरेका छन् ।

उनी १२ औं ओभरको पाँचौं बलमा १६ रनमा एलबीडब्लू आउट भएका हुन् । आउट हुनुअघिको बलमा उनले सन्दीपलाई चौका हानेका थिए ।

२५ वर्षीय ब्रेन्डन स्कटल्यान्डका प्रमुख ब्याटर हुन् । गत सेप्टेम्बरमा टी२० आईमा अष्टेलियाविरुद्ध लगातार दुई अर्धशतक हानेका थिए ।

ग्राण्ड प्रेरी क्रिकेट रंगशालामा टस हारेर पहिला ब्याटिङको निम्तो पाएको स्कटल्यान्डले १३ ओभरमा ३ विकेट गुमाउँदै ३८ रन बनाएको छ । रिची बेरिंग्टन र माइकल जोन्स ३-३ रनमा क्रिजमा छन् ।

तीव्र गतिका बलर करण केसीले पहिलो ओभरको पाँचौं बलमा ओपनर चार्ली टिअरलाई स्कटल्यान्डले खाता नखोल्दै बोल्ड आउट गरेका थिए । दोस्रो विकेटका लागि एन्ड्रयु उमिद र ब्रेन्डनले २६ रनको साझेदारी गरेका थिए ।

सोमपाल कामीले आठौं ओभरको अन्तिम बलमा ओपनर एन्ड्रयू उमिदलाई १४ रनमा बोल्ड आउट गरे । उनले १९ बलमा ३ चौका हानेका थिए । पछिल्लो खेलमा अमेरिकाविरुद्ध ९८ रनको अविजित इनिङ खेलेका थिए ।