डालस, (हाम्रो खेलकुद) – स्कटल्यान्डले आईसीसी विश्वकप लिग-२ त्रिकोणात्मक सिरिजमा नेपाललाई १ सय ५५ रनको लक्ष्य दिएको छ ।

ग्राण्ड प्रेरी क्रिकेट रंगशालामा टस हारेर पहिला ब्याटिङको निम्तो पाएको स्कटल्यान्ड ४१.४ ओभरमा १५४ रनमा अल आउट भयो । स्कटल्यान्डका मार्क वाटले ४० बलमा ३ छक्कासहित सर्वाधिक ३४ रन बनाए ।

स्कटल्यान्डको सुरुवात नै राम्रो हुन सकेन । तीव्र गतिका बलर करण केसीले पहिलो ओभरको पाँचौं बलमा ओपनर चार्ली टिअरलाई स्कटल्यान्डले खाता नखोल्दै बोल्ड आउट गरेका थिए । दोस्रो विकेटका लागि एन्ड्रयु उमिद र ब्रेन्डनले २६ रनको साझेदारी गरेका थिए ।

सोमपाल कामीले आठौं ओभरको अन्तिम बलमा ओपनर एन्ड्रयू उमिदलाई १४ रनमा बोल्ड आउट गरे । उनले १९ बलमा ३ चौका हानेका थिए । पछिल्लो खेलमा अमेरिकाविरुद्ध ९८ रनको अविजित इनिङ खेलेका थिए ।

ब्रेन्डन म्याकमुलेन १२ औं ओभरको पाँचौं बलमा सन्दीप लामिछानेको बलमा १६ रनमा एलबीडब्लू आउट भए । स्कटल्यान्डका कप्तान रिची बेरिंग्टन र माइकल जोन्स समान १९ रनमा आउट भए । जोन्स आरिफ शेखको बलमा ठूलो सट खेल्ने धुनमा कप्तान रोहित पौडेलबाट २२ औं ओभरको चौथो बलमा क्याच आउट भए ।

लगत्तै अर्को ओभरमा गुल्सन झाको बलमा कट खेल्ने धुनमा रिची बेरिंग्टन आरिफ शेखबाट क्याच आउट भएपछि स्कटल्यान्ड २२.४ ओभरमा ७०-५ को दयनीय अवस्थामा पुगेको हो ।

माइकल लिस्क १४, म्याथ्यु क्रस १५ र ज्याक जार्विस शून्यमा आउट भए । नेपालका सन्दीप लामिछानेले १० ओभरमा १ मेडनसहित ४५ रन खर्चेर ३ विकेट लिए । करण केसी, सोमपाल कामी र गुल्सन झाले २-२ विकेट लिए । आरिफ शेखको नाममा १ विकेट रह्यो ।