काठमाडौं(हाम्रो खेलकुद) – सन्तोष यादवको सानदार बलिङको सहयोगमा लुम्बिनी प्रदेशले विराटनगरमा जारी नरेश श्रेष्ठ मेमोरियल यु १९ राष्ट्रिय क्रिकेट प्रतियोगितामा आफ्नो अपराजित यात्रा कायमै राखेको छ ।

तेस्रो खेलमा लगातार जित हात पारेको लुम्बिनीले बुधवार भएको खेलमा कर्णाली प्रदेशलाई पराजित गरेको हो । विराटनगरस्थित गिरिजाप्रसाद कोइराला क्रिकेट मैदानमा भएको खेलमा कर्णाली ४ विकेटले पराजित भयो । कर्णालीले लिएको १ सय रनको लक्ष्य लुम्बिनीले २६.४ ओभरमा ६ विकेट गुमाएर पूरा गर्यो ।

लुम्बिनीको जितमा दर्श साोनार र नर सार्किले समान २०, सन्तोष यादवले १७, कप्तान आकाश त्रिपाटीले १४ तथा ओपनर सम्राट भुषालले १२ रन जोडे । कर्णालीका लागि अनुज चनारा र युनिस ठकुरीले समान २ तथा विपिन शर्मा र दिप पौडेलले समान १ विकेट लिए ।

त्यसअघि टस हारेर पहिले ब्याटिङ गरेको कर्णालीले ३७.३ ओभरमा अल आउट हुदै ९९ रन मात्र बनाउन सक्यो । कर्णालीका लागि ओपनर अरविन्द घर्तीले सर्वाधिक २०, भुपेन्द्र शाहीले १९ तथा अनिरुद्ध कावरले १५ रन बनाए । लुम्बिनीका लागि सन्तोषले १० ओभरमा १९ रन खर्चिएर ६ विकेट लिए । रमेश कुर्मीले २ तथा महेश भार र निर्मल गुरुङले समान १ विकेट लिए ।

लगातार ३ खेल जितेको लुम्बिनी ६ अंकका साथ शीर्ष स्थानमा छ । लगातार दोस्रो हार बेहोरेको कर्णालीले अंक जोड्न सकेको छैन । कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।