काठमाडौं(हाम्रो खेलकुद) – नेपाल प्रिमियर लिग(एनपिएल) को टोली चितवन राइनोजले अफगानिस्तानका लिजेन्ड अलराउन्डर मोहम्मद नावीका छोरालाई अनुबन्ध गरेको छ ।

टोलीका तेस्रो विदेशी खेलाडी रुपमा चितवनले हसन इसाखिललाई अनुबन्ध गरेको बुधवार विज्ञप्तीमार्फत जानकारी गराएको छ । चितवनले पहिलो विदेशी खेलाडीका रुपमा दक्षिण अफ्रिकाका अनुभवी तीव्र गतिका बलर मार्चन्ट डे लांगलाई अनुबन्ध गरेको थियो । दोस्रो विदेशी खेलाडीका रुपमा इङ्ग्ल्यान्डका ल्यूक मार्टिन बेनकेन्स्टाइनलाई अनुबन्ध गरेको थियो ।

इसाखिलले यसै वर्ष जनवरीमा दक्षिण अफ्रिकामा भएको यु १९ विश्व कपमा अफगानिस्तानको प्रतिनिधित्व गरेका थिए । १८ वर्षिय इसाखिलले १६ टि ट्वान्टी आई ४ सय २६ रन बनाएका छन् ।

चितवन राइनोजको प्रतिनिधित्व गर्न आफू आतुर रहेको इसाखिलले बताएका छन् । ‘नेपाली समर्थकले माझ आफ्नो प्रदर्शन देखाउन आतुर छु,’ उनले भनेका छन्।

चितवन राइनोजका प्रबन्ध निर्देशक आयुष न्यौपानले इसाखिलको आगमनले चितवनमा उर्जा थपिने विश्वास व्यक्त गरे । चितवनको‌ मार्की खेलाडीमा कुशल मल्ल र मुख्य प्रशिक्षकमा उमेश पटवाल रहेका छन् । एनपिएलमा ८ टिमको सहभागिता रहेको छ । सहभागी ८ टोलीले समान ४ विदेशी खेलाडी अनुबन्ध गर्न पाउने छ ।

विभिन्न टोलीमा आबद्ध भएका विदेशी खेलाडी यस प्रकार रहेका छन् :

पोखरा एभेन्लेजर्स : अमेरिकाका आन्द्रेस गौस, नेदरल्यान्ड्सका बास डि लिडे र वेस्ट इन्डिजका एन्डसन फिलिप

कर्णाली याक्स : पाकिस्तानका हुसेन तलात र हङकङका बाबर हायात

सुदूरपश्चिम रोयल्स : स्कटल्यान्डका ब्रान्डन मक्मलेन, इङ्ग्ल्यान्डका सेफ जेब र न्युजिल्याण्डका स्टक कुगेलेइन

लुम्बिनी लायन्स : इङ्ग्ल्यान्डका ब्याटर टम मुर्स र अस्ट्रेलियाका बेन कटिङ

काठमाडौं गुर्खाज : नेदरल्यान्ड्सका माइकल लेभिट र नामिबियाका जेहार्ड एरास्मस

विराटनगर किंग्स : ओमानका अकिब इल्यास, क्यानडाका निकोलस किर्तन र न्युजिल्याण्डका मार्टिन गप्टिल

जनकपुर बोल्ट्स : न्युजिल्याण्डका जिमी निशम, अमेरिकाका जोशुवा ट्रम्प

चितवन राइनोज : दक्षिण अफ्रिकाका मार्चन्ट डे लांग र इङ्ग्ल्यान्डका ल्यूक मार्टिन बेनकेन्स्टाइन

चितवन राइनोजको टोली – कुशल मल्ल, रिजन ढकाल, विपिन रावल, रन्जित कुमार, सन्तोष कार्की, दिपेश श्रेष्ठ, गौतम केसी, अमरसिंह राउटेला, दिपक बोहरा, कमलसिंह ऐरी, शरद भेषवाकर, ल्यूक मार्टिन बेनकेन्स्टाइन, मार्चन्ट डे लांग र हसन इसाखिल