काठमाडौं(हाम्रो खेलकुद) – सचिन भट्टले ५ विकेट लिए पछि सुदूरपश्चिम प्रदेशले विराटनगरमा जारी नरेश स्मृती यू १९ राष्ट्रिय क्रिकेट प्रतियोगितामा अर्को जित हात पारेको छ ।

तेस्रो खेलमा दोस्रो जित हात पार्ने क्रममा बिहीवार भएको खेलमा साविक विजेता सुदूरपश्चिमले गण्डकी प्रदेशलाई ५ विकेटले हरायो ।

१ सय ३ रनको लक्ष्य सुदूरपश्चिमले २६ ओभरमा ५ विकेट गुमाएर पूरा गर्यो । सुदूरको जितमा आषिश लोहारले ३५ बलमा २ चौका र ४ छक्काको सहयोगमा सर्वाधिक ३९, युवराज खत्रीले नट आउट २७ तथा नरेन साउदले २७ बलमा नट आउट २० रन जोडे ।

गण्डकीका लागि अपराजित पौडेलले ३ तथा किरण भट्टराई र सिब्रिन श्रेष्ठले समान १ विकेट लिए ।

त्यसअघि गिरिजाप्रसाद कोइराला क्रिकेट स्टेडियममा टस जितेर ब्याटिङ गरेको गण्डकीले ३६.५ ओभरमा अल आउट हुदै १ सय २ रन बनायो ।

गण्डकीका कप्तान अर्जुन कुमालले ५८ बलमा सर्वाधिक ३५ तथा सिब्रिन श्रेष्ठले ५२ बलमा २५ रन बनाउँदा अन्य ब्याटरले दोहोरो अंकमा रन बनाउँन सकेनन् ।

सुदूरपश्चिमका लागि सचिनले ८.५ ओभरमा १३ रन खर्चिएर ५ विकेट लिए । हेमन्त धामी र युवराज खत्रीले समान २ विकेट लिए ।

सुदुरपश्चिमको ४ अंक छ । चौथो खेलमा २ जित र २ हार बेहोरेको गण्डकीको पनि ४ अंक छ । कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।