एजेन्सी – घरेलु टोली अस्ट्रेलियाले पाकिस्तानलाई पहिलो ओडिआईमा सोमवार २ विकेटले हराएको छ ।

३ ओडिआई सिरिजमा अस्ट्रेलियाले १-० को अग्रता बनाएको छ । २ सय ४ रनको लक्ष्य घरेलु टोलीले ३३.३ ओभरमा ८ विकेट गुमाएर पूरा गर्यो ।

अस्ट्रेलियाका विकेटकिपर जोस इङ्ग्लिसले ४२ बलमा ४ चौका र ३ छक्काको सहयोगमा सर्वाधिक ४९ तथा स्टेभन स्मिथले ४६ बलमा ६ चौकाको सहयोगमा ४४ रन बनाए ।

कप्तान प्याट कमिन्सले ३१ बलमा ३२, ज्याक फ्रेर्जर र मार्नोस लाबुस्सेनले समान १६ तथा सन एवटले १३ रन जोडे ।

पाकिस्तानका हरिस रउफले ३, शाहिन शाह अफ्रिदीले २ तथा नसिम शाह र मोहम्मद हुसैनले समान १ विकेट लिए ।

त्यसअघि मेलबर्न क्रिकेट ग्राउण्डमा टस हारेर ब्याटिङको निम्तो पाएको पाहुना टोली ४६.४ ओभरमा अल आउट हुदै २ सय ३ रनको योगफल तयार गरेको थियो ।

पाकिस्तानी टोलीको पहिलो पटक कप्तानी गरिरहेका मोहम्मद रिजवानले ७१ बलमा २ चौका र १ छक्काको सहयोगमा ४४ तथा बाबर अजामले ४४ बलमा ४ चौकाको सहयोगमा ३७ रन बनाए ।

नसिम शाहले ३९ बलमा १ चौका र ४ छक्काको सहयोगमा ४०, शाहिन शाह अफ्रिदीले १९ बलमा २४ तथा इर्फान खानले ३५ बलमा २२ रन जोडेका थिए ।

घरेलु टोलीका लागि मिचेल स्टार्कले ३, कप्तान प्याट कमिन्स र एडम जाम्पाले समान २ तथा मार्नुस लाबुस्सेन र सन एबटले समान १ विकेट लिए । दुई देशबीचको दोस्रो ओडिआई खेल शुक्रवार हुनेछ ।