एजेन्सी – पाकिस्तानले अस्ट्रेलियामा २२ वर्ष पछि ओडिआई सिरिज जितेको छ ।

आईतवार सम्पन्न तेस्रो ओडिआई खेलमा ८ विकेटको सहज जितका साथ पाकिस्तानले तीन खेलको ओडिआई सिरिज २-१ ले जितेको हो । पहिलो ओडिआई अस्ट्रेलियाले जितेको थियो । पाकिस्तानले दोस्रो र तेस्रो खेलमा जितका साथ सिरिज आफ्नो बनाएको हो ।

अस्ट्रेलियाले दिएको १ सय ४१ रनको सहज लक्ष्य पाकिस्तानले २६.५ ओभरमा २ विकेट गुमाएर पूरा गर्यो । पाकिस्तानको जितमा सैयम अयुबले ५२ बलमा ४ चौका र १ छक्काको सहयोगमा सर्वाधिक ४२ रन तथा अब्दुल्लाह सफिकले ५३ बलमा ३७ रन जोडे । कप्तान मोहम्मद रिजवानले २७ बलमा १ चौका र २ छक्काको सहयोगमा नट आउट ३० तथा बाबर अजामले ३० बलमा ४ चौकाको सहयोगमा २८ रन बनाए । अस्ट्रेलियाका लागि लान्स मोरिसले २ विकेट लिए ।

त्यसअघि अस्ट्रेलियाको पर्थमा टस हारेर ब्याटिङको निम्तो पाएको घरेलु टोली ३१.५ ओभरमा अल आउट हुदै १ सय ४० मा समेटियो । टोलीका लागि सन एबटले ४१ बलमा सर्वाधिक ३०, माथ्यु शर्टले २२, एडम जाम्पाले १३ तथा स्पेन्सर जोनसन र आरोन हार्डिले समान १२ रन बनाए ।

पाकिस्तानका लागि शाहिन शाह अफ्रिदी र नसिम शाहले समान ३ विकेट लिए । प्लेयर अफ द म्याच तथा सिरिज भएका हरिस रउफले २ तथा मोहम्मद हसाइनले १ विकेट लिए ।

कप्तानको रुपमा रिजवानले २२ वर्ष पछि पाकिस्तानलाई अस्ट्रेलियामा सिरिज जिताएका हुन् । दुई देशबीच तीन खेलको टि ट्वान्टी आई सिरिज बिहविारबाट सुरु हुनेछ ।