एजेन्सी – दक्षिण अफ्रिकाले दोस्रो टि ट्वान्टी आईमा पाहुना टोली भारतलाई हराएको छ ।

दक्षिण अफ्रिकाले आइतवार भारतलाई ३ विकेटले हराएको हो । जितसँगै दक्षिण अफ्रिकाले ४ खेलको टि ट्वान्टी आई सिरिजमा १-१ को बराबरी गरेको छ ।

१ सय २५ रनको सामान्य लक्ष्य दक्षिण अफ्रिकाले १९ ओभरमा ७ विकेट गुमाएर पूरा गर्यो । दक्षिण अफ्रिकाका लागि ट्रिस्टन स्टब्सले ४१ बलमा ७ चौकाको सहयोगमा सर्वाधिक ४७ रन जोडे ।

रिजा हेनड्रिक्सले २१ बलमा ३ चौका र १ छक्काको सहयोगमा २४ तथा जेरार्ड कोट्जेले ९ बलमा २ चौका र १ छक्काको सहयोगमा नट आउट १९ रन बनाए ।

भारतका वरुण चक्रवर्तीले ४ ओभरमा १७ रन खर्चिएर ५ विकेट लिए । टि ट्वान्टी आई करियरमा वरुणको यो उत्कृष्ट बलिङ हो । अर्शदिप सिंह र रवि बिश्नोइले समान १ विकेट लिए ।

त्यसअघि सेन्ट जर्ज पार्क, ग्केबेरामा टस हारेर ब्याटिङको निम्ता पाएको भारतले निर्धारित २० ओभरमा ६ विकेट गुमाएर १ सय २४ रन मात्र बनाउन सकेको थियो ।

भारतका लागि हार्दिक पाण्ड्याले ४५ बलमा ४ चौका र १ छक्काको सहयोगमा नट आउट रहँदै सर्वाधिक ३९ रन बनाए ।

अक्षर पटेलले २१ बलमा ४ चौकाको सहयोगमा २७, तिलक बर्माले २० बलमा २० तथा अर्शदिप सिंहले नट आउट ७ रन जोडे ।

भारतका लागि पहिलो टि ट्वान्टी आईमा शतक बनाएका ओपनर सन्जु स्यामसन पहिलो ओभरमा नै रनको खाता नखोल्दै आउट भए ।

अर्का ओपनर अभिषेक शर्मा ४ रन बनाउँदै दोस्रो ओभरमा आउट भए । कप्तान सूर्यकुमार यादवले ४ रन मात्र जोड्न सके ।

दक्षिण अफ्रिकाका लागि मार्को यानसन, जेरार्ड कोट्जे, एण्डिल सिमलाने, कप्तान एडेन मारकम र पिटरले समान १ विकेट लिए । दुई देशबीचको तेस्रो टि ट्वान्टी आई खेल बुधवार रहेको छ ।