एजेन्सी – अफगानिस्तानले बंगलादेशविरुद्धको ओडिआई सिरिज जितेको छ ।

तेस्रो ओडिआईमा सोमवार ५ विकेटको जित निकाल्दै अफगानिस्तानले ३ खेलको ओडिआई सिरिज २-१ ले जितेको हो ।

अफगानिस्तानले पहिलो र तेस्रो ओडिआई खेल जित्दा बंगलादेशले दोस्रो ओडिआई जितेको हो । २ सय ४५ रनको लक्ष्य अफगानिस्तानले ४८.२ ओभरमा ५ विकेट गुमाएर पूरा गर्यो ।

अफगानिस्तानको जितमा ओपनर रहमानुउल्लाह गुर्वाजले शतक प्रहार गरे । उनले १ सय २० बलमा ५ चौका ७ छक्काको सहयोगमा १ सय १ रन बनाए । ओडिआई करियरको आठौं शतक उनले १ सय १७ बलमा पूरा गरे ।

प्लेयर अफ द म्याच चुनिएका अजमतुल्लाह उमरजाइले ७७ बलमा ३ चौका र ५ छक्काको सहयोगमा नट आउट ७० रन जोडे । मोहम्मद नावीले २७ बलमा नट आउट ३४ रन जोड्दा सेदिउल्लाह अतलले १४ रन बनाए ।

बंगलादेशका लागि नहिद राना र मुस्ताफिजुर रहमानले समान २ तथा कप्तान मेहेदी हसन मिराजले १ विकेट लिए ।

त्यसअघि शारजहा क्रिकेट स्टेडियममा टस जितेर ब्याटिङ रोजेको बंगलादेशले निर्धारित ५० ओभरमा ५ विकेट गुमाएर २ सय ४४ रन बनाएको थियो ।

बंगलादेशका लागि महमुदुल्लाहले ९८ बलमा ७ चौका र ३ छक्काको सहयोगमा ९८ तथा कप्तान मेहेदी हसन मिराजले १ सय १९ बलमा ४ चौकाको सहयोगमा ६६ रन बनाए ।

ओपनर सौम्य सरकारले २४ तथा अर्का ओपनर तन्जित हसनले १९ रन जोडे । अफगानिस्तानका लागि अजमतुल्लाह उमरजाईले ४ तथा मोहम्मद नावी र राशिद खानले समान १ विकेट लिए ।