काठमाडौं (हाम्रो खेलकुद) – एसीसी यू१९ एसिया कपको तयारीमा रहेको नेपाल यू-१९ टोलीले कर्नाटक यू१९ विरुद्ध पहिलो खेलमा कमजोर ब्याटिङ गरेको छ ।

मुलपानी क्रिकेट मैदानमा बुधबार टस हारेर पहिलो ब्याटिङको निम्तो पाएको नेपालले २७.२ ओभरमा अलआउट हुँदै १ सय १३ रनमात्र जोड्न सक्यो । मध्यक्रमले बिर्सनलायक ब्याटिङ गरेपछि नेपाल कम स्कोरमा समेटियो । कर्नाटकका स्पिनर इसा पुथिगेले ५ विकेट लिँदै कर्नाटकलाई बलियो बनाएका थिए ।

नेपालका लागि ओपनर आकाश त्रिपाठीले सर्वाधिक २७ रन जोडे । उनले ५३ बलमा ४ चौका प्रहार गरेका थिए । १४ औं ओभरमा आकाश आउट हुँदा नेपाल ५७-३ को अवस्थामा थियो । तर त्यसपछि स्पिनरविरुद्ध निरन्तर विकेट खस्दा नेपाल संकटमा पर्यो ।

ओपनर अर्जुन कुमाल ६ रन जोड्दै पाँचौ ओभरमा आउट भएका थिए भने नरेन भत् १ रन जोड्दै सातौं ओभरमा पेभेलियन फर्किए । आकाश र सन्तोषले २८ रनको साझेदारी गर्दै केहीबेर इनिङ सम्हाले ।

१६ औं ओभरको अन्तिम २ बलमा सन्तोष यादव (१०) र रोशन विक (०) लगातार बलमा आउट भए । लगत्तै १७ औं ओभरको दोस्रो बलमा उत्तम मगर पनि खाता नखोली फर्किए ।

दिलसाद अली १ रन जोड्दै आउट भएपछि नेपाल ८१-७ को अवस्थामा पुगेको थियो । तल्लोक्रममा नरेन साउदले १३ रन र युनिश ठकुरीले १२ रन जोड्दै नेपाललाई १ सय रनको आँकडा पार गराए ।

कर्नाटकका पुथिगेले ८ ओभरमा २ मेडनसहित ३१ रन खर्चेर ५ विकेट लिए । तेजसले २ विकेट लिँदा मनोज, प्रणव र ध्रुवले १-१ विकेट लिए ।

५ खेलको सिरिजको सबै खेल मुलपानी क्रिकेट मैदानमा आयोजना हुँदैछ ।