काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल) टोली पोखरा एभेन्जर्सले ट्यालेन्ट हन्टमार्फत नवलपुरका सुदीप अर्याललाई आइकोनिक प्लेयरका रुपमा छनोट गरेको छ ।

पोखराले शुक्रवार अलराउण्डर सुदीप टोलीका लागि आइकोनिक प्लेयरको रुपमा छनोट गरेको जनाएको छ । अलराउन्डर सुदीप ट्यालेन्ट हन्टबाट छनोट हुने पहिलो आइकनिक प्लेयर बनेका छन्।

पोखरा एभेन्जर्सका अध्यक्ष सुबोध त्रिपाठीका अनुसार गण्डकी हिरोज टिमका लागि उत्कृष्ट ५ खेलाडी छनोट गरेको छ । जसमा उत्कृष्ट रहँदै आइकनिक खेलाडी बनेका सुदीपले एनपिएल खेल्ने अवसर पाएका छन् ।

स्याङ्जाका सन्दिप खत्री, कास्कीका कृष्ण पौडेल र सोहेल कुँवर तथा तनहुँका सन्दिप पराजुली गण्डकी हिरोजका रुपमा छनोट भएका छन्।

नेपाल‌ क्रिकेट संघ ( क्यान) को आयोजनामा मंसिर १५ देखि पुस ६ सम्म काठमाडौंमा आयोजना हुने एनपिएलका लागि पोखरामा नेपाली राष्ट्रिय टोलीका कुशल भुर्तेल मार्की खेलाडी छन्।

टिमका सल्लाहकार एवम् परामर्शदाताका रुपमा दक्षिण अफ्रिाकाका लेजेन्ड खेलाडी जोन्टी रोड्स अनुबन्ध भइसकेका छन् । त्यस्तै चेन्नई सुपरकिंग्सका पूर्व ब्याटिङ र फिल्डिङ प्रशिक्षक रहेका राजिव कुमार मुख्य प्रशिक्षकका रुपमा अनुबन्ध भइसकेका छन्।