काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल) टोली सुदूरपश्चिम रोयल्सले सोमवार धनगढीमा र्‍याली आयोजना गर्ने भएको छ ।

सुदूरपश्चिमले धनगढीको चौराहदेखि रंगशालासम्म र्‍यालीको आयोजना गर्ने भएको हो । र्‍यालीमा टोलीका मार्की खेलाडी दिपेन्द्र सिंह ऐरी तथा खेलाडीहरु आरिफ शेख, विनोद भण्डारी लगायत टिममा आवद्ध भएका उपलब्ध हुने सबै खेलाडीको सहभागिता रहनेछ ।

र्‍यालीको तयारी पूरा भएको सुदूरपश्चिमका प्रमुख कार्यकारी अधिकृत प्रकाश खड्काले बताए । खड्का अनुसार सुदूरपश्चिको पहिचानलाई थप उचाइमा पुर्‍याउन सुदूरपश्चिमले क्रिकेटको साथ लिएको बताए । उनले धनगढीमा उपलब्ध हुने सबै सुदूरपश्चिमेलीलाई र्‍यालीमा सहभागी भएर टिमको हौसला बढाउन आग्रह गरे ।

नेपाल क्रिकेट संघ(क्यान) को‌ आयोजनामा ८ टोलीको सहभागितामा मंसिर १५ देखि पुस ६ गते सम्म पहिलो संस्करणको सिद्धार्थ बैंक एनपिएल हुदैछ । सुदूरपश्चिमको मेन्टरमा अष्ट्रेलियाका ब्राड हज तथा मुख्य प्रशिक्षक राष्ट्रिय टोलीका पूर्व प्रशिक्षक जगत टमाटा हुनहुन्छ ।

सुदूरपश्चिम रोयल्सको टोली – दीपेन्द्र सिंह ऐरी, आरिफ शेख, अभिनास बोहोरा, विनोद भण्डारी, अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद , अमित श्रेष्ठ, ब्रान्डन मक्मलेन, सेफ अलि जेब, स्कट कुगेलेइन, रोहन मुस्तफा