एजेन्सी – पाकिस्तानविरुद्धको तीन खेलको टि ट्वान्टी आई सिरिजमा घरेलु टोली अस्ट्रेलियाले क्लिन स्विप गरेको छ ।

लगातार दुई खेल जितेर अघिल्लो खेलमा नै अस्ट्रेलियाले सिरिज जितिसकेको थियो । सोमवार भएको तेस्रो टि ट्वान्टी खेल ७ विकेटले सहज रुपमा जित्दै अस्ट्रेलियाले सिरिजमा क्लिन स्विप गरेको हो ।

१ सय १८ रनको सामान्य लक्ष्य अस्ट्रेलियाले ११.२ ओभरमा मात्र ३ विकेट गुमाएर पूरा गर्यो । अस्ट्रेलियाको सहज जितमा मार्कस स्टोइनसले २७ बलमा ५ चौका र ५ छक्काको सहयोगमा नट आउट रहँदै सर्वाधिक ६१ रन बनाए ।

कप्तान जोस इङ्ग्लिसले २४ बलमा २७, ज्याक फैजरले ११ बलमा १८ तथा टिम डेबिडले नट आउट ७ रन जोडे । पाकिस्तानका लागि अब्बास अफ्रिदी, शाहिन शाह अफ्रिदी र जहान्दाद खानले समान १ विकेट लिए ।

त्यसअघि अस्ट्रेलियाको होर्बाटमा टस जितेर ब्याटिङ गरेको पाकिस्तानले १८.१ ओभरमा अल आउट हुँदै १ सय १७ रनमा समेटिएको थियो ।

पाकिस्तानका लागि बाबर अजामले २८ बलमा ४ चौकाको सहयोगमा सर्वाधिक ४१, हसिबुल्लाह खानले १९ बलमा २४, शाहिन शाह अफ्रिदीले १२ बलमा १६ तथा इर्फान खानले ८ बलमा १० रन बनाएका थिए । पाकिस्तानका अन्य ब्याटरले दोहोरो अंकमा रन बनाउन सकेनन् ।

अस्ट्रेलियाका लागि आरोन हार्डीले ३, स्पेन्सर जोनसन र एडम जाम्पाले समान २ तथा जेभियर ब्राटलिट र नाथन एलिसले समान १ विकेट लिए । यसअघि भएको तीन खेलको ओडिआई सिरिज भने पाकिस्तानले २-१ ले जितेको थियो ।