एजेन्सी – अस्ट्रेलिया विरुद्ध पहिलो टेस्टको दोस्रो इनिङमा भारतले दुई शतकको सहयोगमा विशाल योगफल तयार गरेको छ ।

ओपनर यशस्वी जैसवाल र विराट कोहलीको शतक सहयोगमा भारतले विशाल योगफल तयार गरेको हो । दोस्रो इनिङमा भारतले ६ विकेट गुमाएर ४ सय ८७ रन बनाएसँगै पारी समाप्तीको घोषणा गरेको थियो । कुनै विकेट नगुमाई भारतले १ सय ७२ रन बाट तेस्रो दिन आइतवारको खेल सुरु गरेको थियो ।

भारतका लागि पहिलो इनिङमा रनको खाता नखोलि आउट भएका ओपनर यशस्वीले १ सय ६१ रन बनाए । उनले २ सय ९७ बलमा १५ चौका र ३ छक्का प्रहार गरेका थिए ।

कोहली १ सय ४३ बलमा ८ चौका र २ छक्काको साथमा १ सय रनमा नट आउट रहे । अर्का ओपनर केएल राहुलले १ सय ७६ बलमा ५ चौकाको सहयोगमा ७७ रन जोडे । नितिश कुमार रेड्डीले २७ बलमा ३ चौका र २ छक्काको सहयोगमा नट आउट ३८ रन बनाए ।

अस्ट्रेलियाका लागि नाथन लायनले २ तथा मिचेल स्टार्क, जोस हेजलवुड, कप्तान प्याट कमिन्स र मिचेल मार्शले १ विकेट लिए ।

पहिलो इनिङमा ४६ रनको अग्रता लिएको भारतले अस्ट्रेलियालाई ५ सय ३४ रनको विशाल लक्ष्य दिएको छ । आजै लक्ष्य पछ्याउन सुरु गरेको अस्ट्रेलियाले खराब सुरुवात गरेको छ ।

टोलीका ओपनर नाथन म्याकसुइने खाता नखोल्दै, कप्तान कमिन्स २ तथा मार्नस लाबुस्चेन ३ रनमा आउट भए । क्रिजमा उस्मान ख्वाजा रहेका छन्। भारतका लागि कप्तान जसप्रित बुमराहले २ र मोहम्मद सिराज १ विकेट आफ्नो नाममा गरेका छन् ।

बिहीवार पर्थमा टस जितेर ब्याटिङ गरेको भारतले पहिलो इनिङमा १ सय ५० रन बनाएको थियो । भारतका नितिश रेड्डीले सबैभन्दा धेरै ४१ रन बनाए । अस्ट्रेलियाका जोश हेजलवुडले ४ विकेट लिए ।

अस्ट्रेलिया पहिलो इनिङमा १ सय ४ रनमा अलआउट भएको थियो । अस्ट्रेलियाका मिचेल स्टार्कले सबैभन्दा धेरै २६ रन बनाए । भारतका कप्तान जसप्रीत बुमराहले ५ विकेट लिएका थिए।

हर्सित राणाले ३ तथा मोहम्मद सिराजले २ विकेट लिएका थिए । बोर्डर गावास्कर ट्रफी ५ टेस्टको सिरिजका‌ लागि भारतीय टोली अस्ट्रेलिया भ्रमणमा छ।