एजेन्सी – अफ्रिकी राष्ट्र आइभरी कोस्टले टि ट्वान्टी आई सबैभन्दा कम रनको कीर्तिमान बनाएको छ ।

आइतबार आइसिसी मेन्स टि ट्वान्टी विश्व कप अफ्रिका महादेश उप क्षेत्रीय छनोटमा आइभरी कोस्ट नाइजेरियाविरुद्ध ७ रनमा अल आउट भएको हो । एक इनिङमा ७ रनमा अल आउट हुदै आइभरी कोस्टले आइल अफ म्यान र मंगोलीयाले १० रनमा अल आउट हुँदै बनाएको कीर्तिमान तोडेको छ ।

शनिबार मात्र अन्तर्राष्ट्रिय क्रिकेटमा डेब्यु गरेको आइभरी कोस्टले आफ्नो दोस्रो खेलमा नै नचाहेको कीर्तिमान बनाएको हो । आइभरी कोस्ट सन् २०२२ मा आइसिसीबाट एसोसिएट सदस्य राष्ट्र बनेको हो ।

नाइजेरियाले दिएका २ सय ७२ रनको लक्ष्य पछ्याएको आइभरी कोस्ट ७.३ ओभरमा सात रन बनाउँदै अल आउट भएको थियो । उसका सात खेलाडीले रनको खाता खोल्न नै सकेनन् । नाइजेरियाका लागि दुई खेलाडी समान तीन, एक खेलाडी २ तथा एक खेलाडीले १ विकेट लिएका थिए ।

त्यसअघि नाइजेरियामा भएको खेलमा घरेलु टोलीले टस जितेर पहिले ब्याटिङ गरेकोमा निर्धारित २० ओभरमा ४ विकेट गुमाएर २ सय ७१ रन बनाएको थियो । नाइजेरियाका ओपनर सिलिम सालौले सर्वाधिक १ सय १२ रन जोडेका थिए । उनले ५३ बलमा १३ चौका र २ छक्का प्रहार गरेका थिए । अर्का ओपनर सुलिमन रुन्सेवाले २९ बलमा ५० रन बनाएका थिए ।