एजेन्सी – इन्डियन प्रिमियर लिग(आइपिएल) का लागि भएको मेगा अक्सनमा रोयल च्यालेन्जर्स बेंगलुरु (आरसिबी) सबैभन्दा धेरै रकम बचाउँने टोली बनेको छ।

अर्को वर्ष २०२५ मा हुने १८औं संस्करणको आइपिएलका लागि आइतवार र सोमवार साउदी अरबमा भएको मेगा अक्सनमा आरसिबीले खर्च गर्न तोकिएको सिमा भन्दा ७५ लाख भारतीय रुपैयाँ कम खर्चेको छ । अधिकतम २५ खेलाडी अनुबन्ध गर्न पाउँनेमा आरसिबीले २२ खेलाडी मात्र टोली भित्रायो ।

आइपिएल अक्सनमा सबै टोलीले १ सय २० करोड भारतीय रुपैयाँ खर्च गर्न पाउने नियम थियो । आरसिबीले अक्सन अघि खेलाडी रिटेनमा ३७ करोड खर्च गरिसकेको थियो । विराट कोहलीलाई २१, रजत पाटीदारलाई ११ तथा यश दयाललाई बेंगलुरुले ५ करोड भारतीय रुपैयाँमा रिटेन गरेको थियो ।

अक्सनमा अस्ट्रेलियन तीव्रगतिका बलर जोस हेजलवुडलाई आरसिबीले सर्वाधिक रकममा अनुबन्ध गरेको थियो । हेजलवुडमाथि टोलीले १२ करोड ५० लाख खर्चिएको थियो । आरसिबीले ८ विदेशी खेलाडीको कोटा भने पूरा गरेको छ । विदेशी खेलाडीमा हेजलवुड, फिल साल्ट, लियम लिभिगंस्टोन, टिम डेबिड, रोमारियो शेफर्ड, नुवान तुषारा, जोकब बेथवेल र लुगिं एन्गेडि रहेका छन् ।

चेन्नई सुपर किंग्स र कोलकाता नाइटराइडर्स अक्सनमा सबै भन्दा बढी खर्च गर्ने टोली रहे। दुवै टोलीले समान १ सय १९ करोड ९५ लाख भारतीय रुपैयाँ खर्च गरेका छन् ।

आइपिएल इतिहासमा नै सर्वाधिक महँगा बनेका ऋषभ पन्त २७ करोडमा लखनउमा अनुबन्ध भएका थिए । ऋषभमाथि २७ करोडको खर्चिएकोे लखनउले कुल १ सय १९ करोड ९० लाख खर्चिएको छ ।

आइपिएल इतिकासकै दोस्रा सर्वाधिक महँगा खेलाडीमा र श्रेयस अय्यर रहे । २६ करोड ७५ लाखमा श्रेयसलाई अनुबन्ध गरेको पञ्जाब किंग्सले कुल १ सय १९ करोड ६५ करोड खर्च गर्यो । गएको सिजनको उपविजेता सनराइजर्स हैदराबादले दुई दिन चलेको मेगा अक्सनमा १ सय १९ करोड ८० करोड लाख खर्चिएको थियो ।

आइपिएलको पहिलो संस्करणको च्याम्पियन राजस्थान रोयल्सले मेगा अक्सनमा १ सय १९ करोड ६५ लाख खर्चिएको छ ।

साउदी अरबमा दुई दिन भएको अक्सनमा आइपिएलमा सहभागी १० टोलीले कुल १ हजार २ सय करोड भारतीय रुपैयाँ खर्च गर्न पाउने थिए । टोलीले अक्सन अघि भएको खेलाडी रिटेनमा ५ सय ४३.२५ करोड खर्च गरिसकेका थिए ।

रिटेन र मेगा अक्सनमा गरेर १० टोलीले जम्मा १ हजार १ सय ९७ करोड ६५ लाख भारतीय रुपैयाँ खर्च गरेका छन् । आइपिएलको १८ औं संस्करण मार्च १४ बाट सुरु हुनेछ ।