काठमाडौं(हाम्रो खेलकुद) – पहिलो संस्करणको सिद्धार्थ बैंक नेपाल प्रिमियर लिग(एनपिएल) को तयारीमा रहेको जनकपुर बोल्ट्सले अभ्यास खेलमा लुम्बिनी लायन्सलाई हराएको छ ।

बुधबार भएको अभ्यास खेलमा जनकपुरले लुम्बिनीमाथि ९६ रनको फराकिलो जित हात पार्यो । जनकपुरले दिएको १ सय ६१ रनको लक्ष्य पछ्याएको लुम्बिनी १२.३ ओभरमा ६४ रन बनाउँदै अल आउट भयो ।

लुम्बिनीका लागि सन्दीप जोराले १२ तथा सुर्य तामाङले १० रन जोड्नु बाहेक अन्य ब्याटरले दोहोरो अंकमा रन बनाउन सकेनन् । जनकपुरका लागि मोहसिनले ३, ललित राजवंशी र शेर मल्लले समान २ तथा ओमकार यादवले १ विकेट लिए ।

त्यसअघि मुलपानी मैदानमा टस जितेर पहिले ब्याटिङ गरेको जनकपुरले निर्धारित २० ओभरमा ७ विकेट गुमाएर १ सय ६० रनको योगफल तयार गरेको थियो ।

जनकपुरका लागि ओपनर अनिल शाहले ३४ बलमा ४ चौका र ३ छक्काको सहयोगमा ४८ तथा शुभ कसांकारले २४ बलमा २८ रन जोडेका थिए । मोहशिनले २३ बलमा २५, शेर मल्लले १४ बलमा २१ तथा कप्तान आसिफ शेखले ११ रन बनाएका थिए । लुम्बिनीका लागि अभिषेकले २ तथा सुर्य तामाङ, दिनेश अधिकारी र विवेक यादवले समान १ विकेट लिए ।

आगामी शनिवारबाट एनपिएलको पहिलो संस्करण सुरु हुँदैछ । लिगमा भने मंसिर २३ गते आइतबार यी दुई टोलीको खेल रहेको छ ।