एजेन्सी – अफगानिस्तानका घातक स्पिनर अल्लाह गजान्फरले आईसिसी यु १९ मेन्स विश्व कपको एसिया छनोट गुमाउने सम्भावना रहेको छ ।

सिनियर टोलीबाट समेत खेलिसकेका गजान्फर इन्डियन प्रिमियर लिग(आइपिएल) मा मुम्बइ इन्डियन्समा अनुबन्ध भएका कारण छनोट गुमाउँने सम्भावना रहेको छ ।

सन् २०२६ मा हुने विश्व कपको एसिया छनोट आगामी वर्षको अप्रिलमा नेपालमा आयोजना हुनेछ । आइपिएल पनि सोही समयमा आयोजना हुँदैछ ।

प्रतियोगितामा नेपाल, युएई, अफगानिस्तान, ओमान र हङकङले सहभागिता जनाउँदै छन् । प्रतियोगिताको शीर्ष स्थानमा रहने टोलीले २०२६ मा जिम्बाब्वेमा आयोजना हुने विश्व कपमा स्थान बनाउँने छन् ।

पछिल्लो समयको उम्दा प्रदर्शनले अफगानिस्तान प्रतियोगिताको विजेता बन्दै विश्व कपमा स्थान बनाउँने लक्ष्यमा रहेको छ । तर, घरेलु मैदानमा आयोजना हुँदा नेपाललाई प्रमुख दाबेदार मानिएको छ ।

सिनियर टोलीबाट ८ ओडिआई खेल खेलेका गजान्फरले १२ विकेट लिईसकेका छन् । गत महिना बंगलादेशविरुद्ध एकै खेलमा ६ विकेट लिदै सबैभन्दा कम उमेरमा ६ विकेट लिने खेलाडीमा उनी तेस्रो नम्बरमा रहेका थिए । गजान्फर शुक्रवारबाट युएईमा सुरु हुने यु १९ एसिया कपमा अफगानिस्तानको टोलीमा छन् ।